MŨNDŨ mũka ũũ mwanake nĩ Meli. We aĩ Mũisilaeli, na ekalaa ndũa ya Nasaleti. Ngai nĩweesĩ kana we nĩ mũndũ mũka mũseo mũno. Kĩu nĩkyo kĩtumi watũmie mũlaĩka wake Kavilieli akaneene nake. We nĩwĩsĩ Kavilieli ookie kũtavya Meli ata? Ekai twone.

Kavilieli amwĩie atĩĩ: ‘Wakya, ũla wonewe ũseo mũno. Yeova e vamwe naku.’ Meli ndaĩ aamwona mũndũ ũũ ĩngĩ. We aĩ na kĩũũyũ nũndũ ndaaelewa ũndũ mũndũ ũsu waasya ĩndĩ o kwa mĩtũkĩ Kavilieli ausya w’ĩa wake.

Na amwĩa: ‘Eka ũkĩa, Meli, Yeova nĩwendeew’e nue. Kĩu nĩkyo kĩtumi ũnũkwĩka ũndũ wa ũsengy’a mũno kwaku. O mĩtũkĩ ũkasyaa kana. Na ũkaketa Yesũ.’

Kavilieli nĩwaendeeie na kũelesya: ‘Na mwana ũsu akeethĩwa e mũnene, na akeetawa Mwana wa Ngai Ũla Wĩ Ĩũlũ wa Onthe. Yeova akamũtw’a mũsumbĩ, o ta Ndaviti. Ĩndĩ Yesũ akeethĩwa e mũsumbĩ tene na tene, na ũsumbĩ wake ndũkethĩwa na mũminũkĩlyo!’

Na Meli akũlya: ‘Ũndũ ũũ ũkethĩwa ata? O na nyie ndimũtwae. Na ndyaaĩkala na mũndũũme, kwoou ndonya kũsyaa mwana ata?’

Kavilieli asũngĩa: ‘Vinya wa Ngai ũkooka ĩũlũ waku, kwoou kana kau kakeetawa Mwana wa Ngai.’ Na ĩndĩ amwĩa Meli: ‘Lilikana Elisavethi ũla wa mbaĩ yaku. Andũ maasya nĩ mũkũũ ũndũ ũtatonya kũsyaa syana. Ĩndĩ akasyaa mwana o mĩtũkĩ. Kwoou nũkwona, vai ũndũ Ngai ũtatonya kwĩka.’

O vau kwa vau Meli asya: ‘Nyie nĩ ngombo ya Yeova! Nĩwĩthĩwe kwakwa o ta ndeto syaku.’ Na ĩndĩ mũlaĩka amũtia na athi.

Meli nĩwaendie na mĩtũkĩ akakethye Elisavethi. Yĩla Elisavethi weewie wasya wa Meli, kana kala kaĩ ĩvunĩ kwake kathaka nĩ ũtanu. Nake ausũwa nĩ veva wa Ngai, na amwĩa Meli: ‘Nũathimĩtwe we katĩ wa aka.’ Meli nĩwekalile na Elisavethi ta myei ĩtatũ, na ĩndĩ asyoka mũsyĩ Nasaleti.

Meli aĩ vakuvĩ kũtwawa nĩ mũndũ weetawa Yosevu. Ĩndĩ yĩla Yosevu wamanyie kana Meli akasyaa kana, oona ndaĩlĩtwe nĩkũmũtwaa. Ĩndĩ mũlaĩka wa Ngai amwĩa: ‘Ndũkakĩe kũtwaa Meli atw’ĩke mũka waku. Tondũ Ngai nĩwe ũmũnengete mwana.’ Kwoou Meli na Yosevu matwaana, namo meeteela Yesũ asyawe.

Luka 1:26-56; Mathayo 1:18-25.