LI XMARIA jun ixq aj Israel, chʼinaʼus naʼilok ut wank saʼ li tenamit Nazaret. Li Yos kixtaqla li anjel Gabriel chi aatinak rikʼin xMaria xbʼaan naq chaabʼil xnaʼlebʼ. Ma nakaanaw kʼaru kixye re?

Li anjel kixye re xMaria: ‹Sahaq saʼ laachʼool, li Jehobʼa t-osobʼtesinq aawe!› Li xMaria kisach xchʼool chi rabʼinkil aʼin, xbʼaan naq maajunwa rilom ru li kiʼaatinank re. Ut inkʼaʼ naxnaw kʼaru xyaalal li kiyeheʼk re. Joʼkan naq, saʼ junpaat kituqubʼaak xchʼool xbʼaan li anjel Gabriel.

Li anjel Gabriel kixye re: ‹Matxuwak Maria, li Jehobʼa sa saʼ xchʼool aawikʼin. Joʼkan naq twanq jun laakʼuulaʼal ut Jesus taakʼe choʼq xkʼabʼaʼ›.

Laj Gabriel kixye ajwiʼ: ‹Li kʼuulaʼal aʼin, twanq xwankil ut tkʼabʼaʼiiq choʼq Ralal li Nimajwal Yos. Li Jehobʼa tixkʼe choʼq awabʼej joʼ kiwank chaq laj David. Abʼan li Jesus junelik twanq choʼq awabʼej ut li xʼawabʼejilal maajunwa t-osoʼq›.

Tojaʼ naq li xMaria kixye re li anjel: ‹Chanru twanq inkʼuulaʼal, maajiʼ ninsumla, chi moko wankin ta rikʼin winq?›

Li anjel kixye: ‹Li xsantil musiqʼej li Yos tchalq saʼ aabʼeen. Joʼkan naq li kʼuulaʼal aʼin, Ralal li Yos tixkʼabʼaʼi. Chaajultika li xʼElisabet jun rehebʼ laakomon wank re xkʼuulaʼal, naabʼalebʼ keʼxye naq moko twanq ta xkʼuulaʼal xbʼaan naq cheek chik. Joʼ xaakʼe reetal, maakʼaʼ chʼaʼaj chiru li Yos›.

Li xMaria kixye re li anjel: ‹Laaʼin aj kʼanjel chiru li Jehobʼa! Chiʼuxq wikʼin joʼ xaachʼolobʼ chiwu›. Tojaʼ naq xko li anjel.

Chirix chik aʼan li xMaria xko saʼ rochoch li xʼElisabet. Naq li xʼElisabet kirabʼi xyaabʼ xkux li xMaria, li kʼuulaʼal li wank saʼ xsaʼ li xʼElisabet kiʼeekʼank xbʼaan xsahil xchʼool. Tojaʼ naq li santil musiqʼej kichalk saʼ xbʼeen li xʼElisabet ut kixye re li xMaria: ‹Osobʼtesinbʼilat saʼ xyanqebʼ li ixq›. Li xMaria kikanaak tana oxibʼ po saʼ rochoch li xʼElisabet, tojaʼ naq kisutqʼiik saʼ li tenamit Nazaret.

Li xMaria tsumlaaq rikʼin laj Jose. Abʼan, naq laj Jose kixnaw naq yaj aj ixq li xMaria, kixkʼoxla xkanabʼankil. Tojaʼ naq li anjel kixye re laj Jose: ‹Matkʼoxlak chi sumlaak rikʼin li xMaria. Xbʼaan naq li Yos kikʼehok re li xkʼuulaʼal›. Li xMaria ut laj Jose keʼsumlaak. Chirix chik aʼan kiyoʼlaak li Jesus.