MWANA-NKENTO yai ya kitoko ya beno kemona awa zina na yandi Maria. Yandi vandaka muntu ya Israele yina vandaka kuzinga na mbanza Nazareti. Nzambi zabaka nde yandi vandaka mwana-nkento ya mbote kibeni. Yau yina yandi tindilaka yandi wanzyo Gabriel. Beto tala mambu yina wanzyo kwisaka kutubila yandi.

Wanzyo pesaka yandi mbote mpila yai: ‘Mbote na nge, nkento ya kele nlemvo mingi. Jéhovah kele na nge.’ Maria, yina memonaka ntete muntu ya mutindu yina ve, titaka mingi. Yandi vandaka kudiyula kana wapi nzenza na yandi zolaka kusuka sambu yandi vandaka kubakisa ve mambu ya wanzyo vandaka kutuba. Kansi Gabriel kubwisaka yandi ntima.

Yandi tubaka nde: ‘Kuwa boma ve, Maria. Nge memona nlemvo na Jéhovah. Yau yina yandi kesala dyambu mosi ya nene sambu na nge. Nge tabuta mwana mpi nge tapesa yandi zina ya Yezu.’

Gabriel landaka na kutuba nde: ‘Yandi tavanda nene, mpi bau tabinga yandi Mwana ya Nzambi ya Kuluta Kuzanguka. Jéhovah tatula yandi ntotila, bonso David. Kansi Yezu tavanda ntotila ya bamvula yonso mpi kimfumu na yandi tavanda na nsuka ve!’

Maria yufulaka yandi nde: ‘Inki mutindu yau tasalama. Inki mutindu mono tabuta mwana sambu mono mekwela ntete ve?’

Wanzyo vutudilaka yandi nde: ‘Ngolo ya Nzambi takwisa na nge. Yau yina bau tabinga mwana nde Mwana ya Nzambi.’ Na nima, yandi tubaka na Maria nde: ‘Keti bantu vandaka kutuba ve nde Elizabeti, mpangi na nge, nde yandi meluta mvula ya kubuta mwana? Kansi, yandi mpi tabuta mwana. Bonso nge kemona yau, Nzambi lunga sala mambu yonso.’

Maria vutudilaka yandi nde: ‘Mono kele mpika ya Jéhovah! Bika yau vanda bonso nge metuba.’ Na yau wanzyo bikaka yandi.

Na nima ya bilumbu, Maria kwendaka na nzo ya Elizabeti. Ntangu Elizabeti waka ndinga ya Maria, mwana vandaka na divumu nikanaka na kyese. Elizabeti fulukaka na mpeve santu mpi tubaka na Maria nde: ‘Nge mesakumunwa na kati ya bankento yonso.’ Maria vandaka na nzo ya Elizabeti bangonda tatu na nima yandi vutukaka na Nazareti.

Joseph yulaka Maria na makwela. Ntangu Joseph waka nde nkento ya yandi zolaka kukwela vandaka na divumu, yandi bakaka lukanu ya kubuya yandi. Kansi wanzyo ya Nzambi tubilaka yandi nde: ‘Kutita ve na kukwela Maria sambu yau kele Nzambi mepesa yandi mwana yina.’ Na yau, Maria ti Joseph kwelanaka mpi vingilaka lubutuku ya Yezu..