RŨGANO RWA 84
Mũraika Gũceerera Mariamu
MŨIRĨTU ũyũ mũthaka nĩ Mariamu. Nĩ mũirĩtu Mũisiraeli, ũtũũraga thĩinĩ wa itũũra rĩa Nazarethi. Ngai nĩ oĩ atĩ nĩ mũirĩtu mwega mũno. Na nĩkĩo gĩtũmi arekirie mũraika wake Gabrieli aarie nake. Wee nĩ ũĩ ũrĩa Gabrieli aroka kwĩra Mariamu? Ta reke tũone.
‘Wĩ mũhoro, wee wĩ mũrathime mũno,’ Ũguo nĩguo Gabrieli eerire Mariamu. ‘Jehova arĩ hamwe nawe.’ Mariamu ndonete mũndũ ũcio mbere ĩo o na hanini. Nĩamakire, tondũ ndataũkĩirũo nĩ ndũmĩrĩri yake. O rĩo Gabrieli akĩmũninĩra kĩmako gĩake.
Aamwĩrire atĩrĩ, ‘Mariamu, tiga gwĩtigĩra. Jehova nĩ akenetio nĩwe. Na nĩ kĩo gĩtũmi nĩ egũgwĩkĩra ũndũ wa magegania. Nĩ ũkũgĩa ihu ũciare kahĩĩ. Nako nĩũgagatua Jesu.’
Gabrieli aathire na mbere kũmũtarĩria atĩrĩ: ‘Nake nĩagatuĩka mũnene, ningĩ nĩagetagwo Mũrũ wa Ũrĩa-wĩ-Igũrũ-mũno. Nake Jehova nĩakamũtua mũthamaki, ta ũrĩa Daudi aarĩ. No ĩndĩ Jesu agatuĩka mũthamaki tene na tene, na ũthamaki wake ndũgathira orĩ orĩ.’
Nake Mariamu agĩkĩũria atĩrĩ, ‘Ũndũ ũyũ ũngĩkĩka atĩa? O na ndikĩrĩ mũhiku. Na ningĩ ndiũĩ mũndũ mũrũme, ingĩgĩciara atĩa?’
Gabrieli aamũcokeirie akiuga ũũ, ‘Hinya wa Ngai nĩũrĩgũtonya. Na nĩ ũndũ ũcio kaana gagetwo mũrũ wa Ngai.’ Ningĩ akĩĩra Mariamu: ‘Ririkana Elizabethi, ũrĩa wa mũhĩrĩga wanyu. Andũ moigire atĩ aarĩ mũkũrũ mũno wa kũgĩa ciana. No ica ikuhĩ nĩegũciara kahĩĩ. Rĩu no ũkĩone atĩ gũtirĩ ũndũ ũngĩrema Ngai.’
O rĩo Mariamu akiuga atĩrĩ: ‘Niĩ-rĩ, ndĩ ngombo ya Jehova! Ndĩroekwo o ta ũguo woiga.’ Nake mũraika agĩgĩthiĩra.
Mariamu agĩũkĩra akĩhiũha agacerere Elizabethi. Rĩrĩa Elizabethi aiguire mũgambo wa Mariamu-rĩ, kaana karĩa kaarĩ nda yake gakĩambũrũrũka nĩ gĩkeno. Elizabethi akĩiyũrũo nĩ roho wa Ngai, na akĩĩra Mariamu atĩrĩ: ‘Kũrathimwo nĩwe kũrĩ andũ anja othe.’ Mariamu agĩikara kwa Elizabethi ta mĩeri ĩtatũ, thutha ũcio akĩhũndũka mũciĩ kwao Nazarethi.
Mariamu aarĩ hakuhĩ kũhikio nĩ mũndũ wetagwo Jusufu. Rĩrĩa Jusufu aamenyire atĩ Mariamu aarĩ hakuhĩ gũciara kaana-rĩ, agĩtua atĩ ndagĩrĩirũo nĩ kũmũhikia. No ĩndĩ mũraika wa Ngai akĩmumĩrĩra akĩmwĩra atĩrĩ: ‘Ndũgetigĩre kũhikia Mariamu atuĩke mũtumia waku. Tondũ nĩ Ngai ũmũhete kahĩĩ.’ Nĩ ũndũ ũcio Mariamu na Jusufu makĩhikania, na magĩgĩeterera Jesu aciarũo.
Icunjĩ Ingĩ Hihi Ũngĩenda Gũthoma
JESU—NĨWE NJĨRA, MA, NA MUOYO
Ndũmĩrĩri Igĩrĩ Kuuma Kũrĩ Ngai
Mũraika Gaburieli aaheanire ndũmĩrĩri ciarĩ nditũ gwĩtĩkia.
WĨGEREKANIE NA WĨTĨKIO WAO
Mariamu
Ũrĩa Mariamu aaiyũkirie ndũmĩrĩri ya mũraika Gaburieli wonanagia atĩa atĩ aarĩ na wĩtĩkio? Nĩ ngumo irĩkũ ingĩ cia bata Mariamu onanirie?
