ARNAQ pinnersoq una tassaavoq Maria. Israelikkuuvoq Nazaretimilu najugaqarluni. Guutip nalunngilaa ajunngitsuusoq Guutimillu mianerinnittuusoq. Taamaattumik inngilini Gabriel taassumunnga oqariartortippaa. Nalunngiliuk Gabrielip Maria qanoq oqariartorfigigaa? Tusariassagit.

’Pilluarna, saammaanneqangaartutit uumaa,’ Gabrielip oqarfigaa. ’Jehovap najorpaatit.’ Kia pulaaraani Mariap naluaa. Takusimanngisaannarpaa. Eqqissiunnaalerpoq, suna pineraa paasinnginnamiuk. Gabrielilli erniinnavik eqqissisarpaa.

’Erseqinak, Maria,’ oqarpoq. ’Jehovap iluareqaatit. Taamaattumik tupinnarluinnartumut atorniarpaatit. Erniinnaq meerartaassaatit. Jesusimillu atsissavat.’

Nangilluni Gabrielip nassuiaappaa: ’Meeraq alliartussaaq Guutillu qutsinnerussaartup erneranik taaneqassalluni. Jehovap kunnginngortikkumaarpaa, soorlu David kunngiusimasoq. Jesusili naassaanngitsumik kunngiussaaq, naalagaaffialu soraarfeqassanngilaq!’

’Qanoq ililluni tamanna pissava?’ Mariap Gabriel tupigusulluni aperaa. ’Ueqanngilanga, angummillu inooqateqarsimanngilanga. Qanoq ilillunga meerartaarsinnaavunga?’

’Guutip pissaanera ilinnut piumaarpoq,’ Gabriel akivoq. ’Taamaattumik meeraq Guutip erneranik taaneqassaaq.’ Taava Maria oqarfigaa: ’Eqqaamajuk eqqarlit Elisabet. Inuit oqaraluarput utoqqaavallaaqigami meerartaarsinnaanngitsoq. Erniinnarli ernertaassaaq. Soorlu takusinnaagit Guutimut sumik ajornartoqanngilaq.’

Taava Maria oqarpoq: ’Tassa Jehovap kiffaraanga. Oqaatsit naapertorlugu pineqarlanga.’ Taava inngilip qimappaa.

Maria Elisabetimut aallarasuarpoq. Mariap nipaa Elisabetip tusarmagu Elisabetip ilumiua meeraq nuannaarnermit aalalerpoq. Elisabet Guutip anersaavanik ilumioqangaalerpoq, Marialu oqarfigalugu: ’Immikkut pilluaqqusaavutit arnani tamani.’ Mariap Elisabet najorpaa qaammatit pingasut, taavalu Nazaretimut angerlamut aallarpoq.

Mariap angut Josefimik atilik katittussaavaa. Tusaramiulli Maria naartusoq Josef isumaqalerpoq aappartaarisariaqarnagu. Guutilli inngiliata oqarfigaa: ’Siooraqinak Maria nuliartaarissallugu. Guutip-una ernertaartussanngortikkaa.’ Maria Josefilu katipput, Jesusillu inunngornissaa utaqqilerpaat.