AWE mwanamukazhi walamba uji pa kikye kipikichala ye Maliya. Wajinga mwina Isalela waikalanga mu muzhi wa Nazala. Lesa wayukile’mba uno mwanamukazhi wajinga wa kishinka. O ene mambo o atumijile malaika wanji Ngabaliela kwi aye. Nanchi wayuka byambo byo aishile na kwamba Ngabaliela kwi Maliya nyi? Twaya tumone.

Ngabaliela wamwambijile’mba: ‘Mutende, obewa mwanamukazhi watokwa bingi. Yehoba uji ne obewa.’ Maliya kechi wakimwenepo kala muntu wa uno mutundu ne. Waakaminwe bingi mambo kechi wayukile malaika mo atazhizhe byambo byanji ne. Bino ponkapotu, Ngabaliela wamutekeneshe.

Aye waambile’mba: ‘Kange uchine ne Maliya, mambo Yehoba wakubila bibusa. O ene mambo o akobila kintu kya kukumya kwi obewa. Ukasema mwana wa mulume. Kabiji ukamutumba jizhina’mba Yesu.’

Ngabaliela watwajijile kulondolola’mba: ‘Uno mwana ukekala ke mukatampe kabiji ukatelwa’mba Mwana Lesa Mwine Wakila. Yehoba ukamupa bufumu byonka byajinga Davida. Bino, aye Yesu ukekala mfumu myaka ne myaka kabiji bufumu bwanji kechi bukapwa ne!’

Maliya waipwizhe’mba: ‘Lelo kino kikamweka byepi? Kechi nasongolwa ne. Kechi nasambakanapo kala na wa mulume ne, onkao mambo, nakonsha kwikala byepi na mwana?’

Ngabaliela wakumbwile’mba: ‘Bulume bwa Lesa bukekala pe obewa. Onkao mambo, mwana ukatelwa’mba Mwana Lesa.’ Kepo aambijile Maliya amba: ‘Vuluka mulongo obe Elisabeta. Bantu baambilenga’mba wakotele bingi kuba waikala na mwana ne. Pano bino, bukumotu ekale na mwana wa mulume. Naketekela waswa kuba’mba, kafwako kintu kiji kyonse Lesa kyo akankalwa kuba ne.’

Ponkapo Maliya waambile’mba: ‘Amiwa ne muzha wa Yehoba! Lekai kyubiwe kwi amiwa byonka byo mwaamba.’ Malaika wamushile ne kumusha.

Maliya waimene lubilo ne kuya na kumona Elisabeta. Elisabeta byo aumvwine jiwi ja kwa Maliya, mwana wajinga munda yanji wafunkishe na lusekelo. Elisabeta wayujile na mupashi wa Lesa ne kwambila Maliya amba: ‘Obewa wakila mu kubilwa bibusa mu banabakazhi bonse.’ Maliya waikele ne Elisabeta pa bañondo basatu, kepo abwelele kwabo ku Nazala.

Maliya wajinga pepi na kusongolwa ku mwanamulume wa jizhina ja Yosefwa. Bino Yosefwa byo ayukile’mba Maliya katatakatu akekale na mwana, walangulukile’mba kechi wafwainwa kumusongola ne. Ponkapo, malaika wa Lesa waishile kwi aye ne kumwambila’mba: ‘Kange uchine kusenda Maliya amba ekale mukazhobe ne. Mambo Lesa ye wamupa uno mwana.’ Onkao mambo, ba Maliya ne Yosefwa besongwele kabiji baikele kwa kubula kusambakanapo kufikatu ne kimye Yesu kyo asemekelwe.