YU NO udat na dis fayn uman? Na in nem Meri. In na wan Izrɛlayt uman we de na wan tɔŋ we dɛn kɔl Nazarɛt. Gɔd no se Meri na gud pɔsin. Na dat mek i sɛn wan enjɛl we nem Gebrɛl to Meri. Yu no wetin Gebrɛl kam tɛl Meri? Lɛ wi si.

Gebrɛl tɛl Meri se: ‘Kushɛ o! Gɔd dɔn blɛs yu ɛn i de wit yu.’ Meri nɔ ɛva si dis kayn pɔsin yet. I fred bikɔs i nɔ no wetin di enjɛl min. Bɔt Gebrɛl nɔ want mek i fred.

Gebrɛl tɛl am se: ‘Meri, nɔ fred. Jiova dɔn blɛs yu. Na dat mek i de kam du wan wɔndaful tin fɔ yu. Yu de kam bɔn pikin. Ɛn yu fɔ kɔl am Jizɔs.’

Dɔn Gebrɛl tɛl am se: ‘Dis pikin go bi impɔtant pɔsin. Dɛn go kɔl am Gɔd we pas ɔl, in Pikin. Jiova go mek i bi kiŋ lɛk Devid. Bɔt Jizɔs go bi kiŋ sote go, ɛn in kiŋdɔm go de te go.’

Meri aks am se: ‘Aw ɔl dis go bi? A nɔ mared ɛn a nɔ wan de du man biznɛs, so aw a go bɔn pikin?’

Gebrɛl ansa am se: ‘Gɔd in spirit go kam pan yu. So dɛn go kɔl di pikin we yu go bɔn, Gɔd in Pikin.’ Dɔn i tɛl Meri se: ‘I nɔ go te igen, yu fambul we nem Ilizabɛt go bɔn bɔy pikin, pan ɔl we pipul dɛn se i dɔn ol fɔ bɔn. So yu si, natin nɔ de we Gɔd nɔ ebul du.’

We Meri yɛri dat, i tɛl di enjɛl se: ‘Mi na Jiova in savant. Mek ɔl wetin yu dɔn tɔk se go bi to mi, bi.’ Dɔn di enjɛl go.

I nɔ tu te afta dat, Meri go to Ilizabɛt. We Ilizabɛt yɛri Meri in vɔys, di pikin we de na Ilizabɛt in bɛlɛ, jomp. Gɔd in spirit kam insay Ilizabɛt, so i tɛl Meri se: ‘Gɔd dɔn blɛs yu pas ɔl dɛn ɔda uman dɛn.’ Meri de wit Ilizabɛt fɔ lɛk tri mɔnt so. Afta dat i go bak na Nazarɛt.

Meri fɔ mared to wan man we nem Josɛf. Bɔt we Josɛf no se Meri gɛt bɛlɛ, i nɔ bin want mared am igen. Bɔt Gɔd in enjɛl tɛl Josɛf se: ‘Nɔ fred fɔ mared Meri. Na Gɔd in spirit kam pan am we mek i gɛt bɛlɛ.’ So Josɛf mared Meri, ɛn dɛn wet fɔ di tɛm we Meri go bɔn Jizɔs.