Esimwititi 84: Muengeli ta dingura Mariya
MUKADI ogu gomuwa yige Mariya. Age Muisraeli ogu ga tunga modoropa zaNasareta. Karunga ga mu diva asi age muntu gomuwa. Eyi yiyo ga mu tuminine muengeli gwendi Ngabiliyera a ka uyunge nage. Ono diva asi yinke ana kuyatantera Ngabiliyera Mariya? Tu tareni.
Ngabiliyera ta mu tantere asi: ‘Moro! Ove va swera unene. Jehova kumwe noge ana kara.’ Mariya kapi ga mona rumwe muntu ogu. Ta limbilirwa, morwa kapi ana diva asi yinke ana tamba. Nye poopo Ngabiliyera ta nyikida utjirwe wendi.
Ta tanta asi: ‘Mariya, wa ha tjira. Jehova ana ku fire nkenda. Eyi yiyo ana ku ka ku ruganena sininke sosiwa unene. Ove ntaantani o ka kare nomunona. Makura ngo mu ruke Jesus.’
Ngabiliyera ta twikire kusingonona asi: ‘Munona ogu nga kara munene, ntani ngava mu tumbura asi MunwaKarunga gekeguru-guru. Jehova nga mu ninka hompa, ngomu ga kere Ndafita. Nye Jesus nga kara hompa narunye, ano uhompa wendi kapi ngau haga!’
Mariya ta pura asi: ‘Ngapi omu ngayi genda? Ame nampili kukwara kapi na kwara. Kapi na tunga rumwe nomugara, ngapi omu ngani gwana munona?’
Ngabiliyera ta limburura asi: ‘Nonkondo daKarunga ngadi ku wizira. Yiyo nye ngava tumbwira munona ogo asi MunwaKarunga.’ Makura ta tantere Mariya asi: ‘Diworoka munwanyoko Elisabeta. Vantu ngava tanta asi age ga kurupa unene mokugwana vana. Nye ntaantani a ka kare nomunona gomugara. Karunga kutupu eyi ayi mu tjindire.’
Poopo Mariya ta tanta asi: ‘Ame ni mukareli gwaJehova! Yi horokere nge tupu moomu ono tanta.’ Muengeli makura ta ka za.
Mariya ta genderere a ka dingure Elisabeta. Elisabeta apa ana zuvhu ezwi lyaMariya, munona ogu ana kara mezimo lyaElisabeta ta vatauka koruhafo. Elisabeta ta zura mpepo zaKarunga nokutantera Mariya asi: ‘Ove kwa fumana mokatji kovakadi.’ Mariya ta kara pwaElisabeta makwedi gatatu, makura ta tengura kembo koNasareta.
Mariya kuna kara pepi nokukwara mugara gedina Josefa. Nye Josefa, apa ana zuvhu asi Mariya ta ka gwana munona, ta gazara asi ga ha mu kwara. Muengeli gwaKarunga makura ta mu tantere asi: ‘Wa ha tjira kugusa Mariya, a kare mukadoge. Morwa Karunga yige ana mu pe munona gomugara.’ Mariya naJosefa makura tava likwara nokundindira ehampuruko lyaJesus.
Rukasa 1:26-56; Mateusa 1:18-25.
Mapuro
- Yilye ogu mukadi mefano?
- Yinke ana kutantera Ngabiliyera Mariya?
- Ngapi omu ana kufatwilira Ngabiliyera Mariya asi age nga kara nomukeke nampili ngomu kapi ga tunga rumwe nomugara?
- Yinke yina horoka apa Mariya ana ka dingura munwazina Elisabeta?
- Yinke ana gazara Josefa apa ana zuvhu asi Mariya ta ka gwana munona, nye morwasinke ana rundwilire egano lyendi?
Mapuro gokugwederera ko
- Resa Rukasa 1:26-56.
Yinke azi likida Rukasa 1:35 kuhamena kupira kusikilira mo kwaAdamu momauta gaMariya apa eparu lyaMunwaKarunga va li rundwilire li tuned meguru?
Ngapi omu ga gwene Jesus efumano nampili komeho zehampuruko lyendi?
Sihonena musinke sosiwa ga gava Mariya koVakriste naina ava ava gwana yitumbukiro yoyirugana yokulikerera?
- Resa Mateusa 1:18-25.
Nampili ngomu Jesus kapi va mu pere edina Imanuwere, ngapi omu sirugana sendi ngomuntu sa sikisire mo ntanto zalyo?
Kuvhura o hafere hena
HONENA EPURO LYAWO
Mariya—“Ame ni mukereli gwaJehova”
Elimbururo lyaMariya, ngapi omu lya likidire asi ga kara nepuro? Yikara musinke yimwe yoyiwa ga likidire Mariya?
