O MOTE ankento ndioyo i Maria. Mwisi Isaele, wazingilanga muna mbanza Nazarete. Nzambi wazaya wo vo muntu ambote. Muna kuma kiaki, watuma Ngambiele wa mbasi andi kenda vovana yandi. Nga ozeye edi kavova Ngambiele kwa Maria? Yambula twawa.

Ngambiele okotele muna kena, oku vo: ‘Kiambote e nkwa nsambu. O Yave una yaku.’ Maria kazaya muntu ndioyo ko. O moyo andi utelamene, kadi kazeye ko dina kazolele vova. Kansi, vana vau Ngambiele umvuvikidi o ntima.

Umvovese vo, ‘kumoni wonga ko, e Maria: O Yave uyangalelele kikilu. Muna kuma kiaki ovanga diambu diasivi kwa ngeye. Mwana owuta. Wamvana nkumbu a Yesu.’

“Nene kekala,” u kavova Ngambiele ‘oyikilwa vo Mwan’a Mpungu; o Yave okunkitula se ntinu nze una wakala Davidi. Kansi, o Yesu oyala se ntinu yakwele mvu; e kintinu kiandi ke kisuka ko.’

O Maria oyuvwidi kwa mbasi vo, ‘aweyi divangamena ediadi? Kizeye yakala ko kadi kiasompwa ko, aweyi ndenda wutila mwana?’

Ngambiele umvutwidi vo: ‘O nkum’a Nzambi ukuyitalela; muna wau, o mwana oyikilwa vo Mwan’a Nzambi.’ Ovovese mpe Maria vo: ‘Sungamena Elisabete, wa yitu kiaku. Wantu bevovanga vo osakidi kimbuta muna wuta mwana. Kansi, ke kolo ko oyandi mpe owuta mwana. Kadi, kuna kwa Nzambi mawonso melendakana.’

Vana vau o Maria ovovele vo: ‘Tala i ntaudi a Yave kwame; e diambu diaku yambula dialungana omu mono nze una ovovele.’ O mbasi wele kwandi.

O Maria otelamene, wele-wele kingula Elisabete. Elisabete vava kawa nding’a Maria, mwana muna vumu kiandi otimukini ye kiese. Elisabete ozele yo mwand’avelela a Nzambi, ovovese Maria vo: ‘Osambwilu vana vena akento awonsono.’ Maria okedi yo Elisabete ngonde tatu, i bosi ovutukidi kuna Nazarete.

O Maria se kesompa, nkumbu a nzitikil’andi Yosefe. Kansi, vava Yosefe kazaya vo o Maria omonekene ye vumu kazola diaka kazala yandi ko. I bosi, mbasi a Nzambi umvovese vo: ‘Kumoni wonga wa tambula Maria se nkaz’aku ko, kadi kina kayimìti i Mwan’a Nzambi kwandi.’ Ozevo, Yosefe yo Maria basompanene, yo vingila ngutuk’a Yesu.