ທູດສະຫວັນມາຢາມມາລີ
ບົດ 84
ທູດສະຫວັນມາຢາມມາລີ
ສະຕີງາມຄົນນີ້ຄືມາລີ. ນາງເປັນຄົນຍິດສະລາເອນອາໄສຢູ່ໃນເມືອງນາຊາເລດ. ພະເຈົ້າຊາບວ່ານາງເປັນຄົນທີ່ມີຄຸນສົມບັດດີຫຼາຍ. ດ້ວຍເຫດນັ້ນພະອົງໄດ້ສົ່ງຄາບລິເອນທູດສະຫວັນຂອງພະອົງມາເວົ້າກັບນາງ. ເຈົ້າຮູ້ບໍວ່າຄາບລິເອນເວົ້າຫຍັງກັບມາລີ? ໃຫ້ເຮົາເບິ່ງດ້ວຍກັນ.
ຄາບລິເອນເວົ້າແກ່ເຂົາວ່າ: ‘ຈົ່ງຈຳເລີນເຖີດ ເຈົ້າຜູ້ເປັນທີ່ໂຜດປານອັນໃຫຍ່ ພະເຢໂຫວາສະຖິດຢູ່ກັບເຈົ້າ.’ ມາລີບໍ່ເຄີຍໄດ້ເຫັນຄົນຜູ້ນີ້ມາກ່ອນ. ນາງຮູ້ສຶກໜັກໃຈເພາະນາງບໍ່ຮູ້ວ່າທ່ານຜູ້ນັ້ນໝາຍຄວາມວ່າຢ່າງໃດ. ແຕ່ທັນໃດນັ້ນຄາບລິເອນກໍ່ໃຫ້ຄວາມກັງວົນຂອງນາງຜ່ອນຄາຍລົງ.
ທ່ານກ່າວວ່າ: ‘ມາລີເອີຍ ຢ່າຊູ່ຢ້ານ ພະເຢໂຫວາຊອບໃຈກັບເຈົ້າຫຼາຍ. ເຫດນັ້ນພະອົງຈະກະທຳສິ່ງໜ້າພິດສະຫວົງສຳລັບເຈົ້າ. ເຈົ້າຈະມີບຸດ. ແລະເຈົ້າຈະໃຫ້ຊື່ບຸດນັ້ນວ່າເຍຊູ.’
ຄາບລິເອນອະທິບາຍຕໍ່ໄປວ່າ: ‘ບຸດຄົນນີ້ຈະເປັນໃຫຍ່ ແລະທ່ານຈະເປັນທີ່ເອີ້ນວ່າ ບຸດຂອງພະເຈົ້າອົງສູງສຸດ. ພະເຢໂຫວາຈະຕັ້ງພະອົງເປັນກະສັດຄືດາວິດ. ແຕ່ພະເຍຊູຈະໄດ້ເປັນກະສັດຕະຫຼອດໄປເປັນນິດ ແລະລາຊະອານາຈັກຂອງພະອົງຈະບໍ່ມີມື້ສິ້ນສຸດ!’
ມາລີຖາມວ່າ: ‘ທັງໝົດນີ້ຈະເປັນໄດ້ຢ່າງໃດ? ເພາະຂ້າພະເຈົ້າຍັງບໍ່ທັນແຕ່ງດອງ. ຂ້າພະເຈົ້າຍັງບໍ່ໄດ້ຮ່ວມຮູ້ກັບຜູ້ຊາຍ ດັ່ງນັ້ນຂ້າພະເຈົ້າຈະມີບຸດໄດ້ຢ່າງໃດ?’
ຄາບລິເອນຕອບວ່າ: ‘ລິດເດດອຳນາດຂອງພະເຈົ້າຈະລົງມາເທິງເຈົ້າ. ດັ່ງນັ້ນບຸດນັ້ນຈະເປັນທີ່ເອີ້ນວ່າບຸດຂອງພະເຈົ້າ.’ ຄັນແລ້ວທ່ານບອກນາງວ່າ: ‘ຈົ່ງລະລຶກເຖິງເອລີຊາເບດຍາດພີ່ນ້ອງຂອງເຈົ້າ. ຄົນທັງຫຼາຍເວົ້າກັນວ່ານາງເຖົ້າເກີນໄປທີ່ຈະມີລູກໄດ້ ແຕ່ບັດນີ້ ໃນອີກບໍ່ດົນນາງກໍ່ຈະໄດ້ບຸດຊາຍ. ດັ່ງນັ້ນເຈົ້າຈົ່ງຮູ້ວ່າ ບໍ່ມີສິ່ງໃດທີ່ພະເຈົ້າຈະກະທຳບໍ່ໄດ້.’
ທັນໃດນັ້ນມາລີກ່າວວ່າ: ‘ຂ້າພະເຈົ້າເປັນຍິງທາດຂອງພະເຢໂຫວາ! ຂໍໃຫ້ບັງເກີດແກ່ຂ້າພະເຈົ້າຕາມຖ້ອຍຄຳຂອງທ່ານເຖີດ!’ ແລ້ວທູດສະຫວັນກໍ່ຈາກໄປ.
ມາລີຈຶ່ງຮີບໄປຢາມເອລີຊາເບດ. ເມື່ອເອລີຊາເບດໄດ້ຍິນສຽງເວົ້າຂອງມາລີລູກອ່ອນໃນທ້ອງຂອງເອລີຊາເບດດີ້ນດ້ວຍຄວາມຍິນດີ. ເອລີຊາເບດເຕັມໄປດ້ວຍພະວິນຍານຂອງພະເຈົ້າຈຶ່ງກ່າວແກ່ມາລີວ່າ: ‘ນາງເປັນຜູ້ໄດ້ຮັບພະພອນພິເສດໃນທ່າມກາງສະຕີທັງຫຼາຍ.’ ມາລີພັກຢູ່ກັບເອລີຊາເບດປະມານສາມເດືອນ ແລະແລ້ວຈຶ່ງເມືອບ້ານທີ່ເມືອງນາຊາເລດ.
ມາລີຈວນຈະແຕ່ງດອງກັບຊາຍທີ່ຊື່ໂຍເຊບ. ແຕ່ເມື່ອໂຍເຊບຮູ້ວ່າມາລີຈະມີບຸດ ເຂົາກໍ່ຄິດວ່າບໍ່ຄວນຈະແຕ່ງດອງກັບນາງ. ຄັນແລ້ວທູດສະຫວັນຂອງພະເຈົ້າກ່າວແກ່ເຂົາວ່າ: ‘ຢ່າຊູ່ຢ້ານຈະເອົານາງມາລີມາເປັນເມຍຂອງເຈົ້າ. ເພາະວ່າພະເຈົ້າເປັນຜູ້ທີ່ໃຫ້ນາງມີບຸດຊາຍ.’ ດັ່ງນັ້ນມາລີແລະໂຍເຊບກໍ່ໄດ້ແຕ່ງດອງ ແລະເຂົາທັງສອງລໍຖ້າການປະສູດຂອງພະເຍຊູ.
ລຶກາ 1:26-56; ມັດທາຍ 1:18-25.
