MARÍA tbʼiju tbʼanel xuʼj lu. Jun aj Israel te, atz nanqʼina tuj tnam te Nazaret. Ojtzqiʼn tuʼn Dios qa tbʼanil xuʼj te. Tuʼntzunju, ma tzaj tsamaʼn t-anjel yolil tukʼe. ¿Nel tnikʼe tiʼ in xi tqʼamaʼn anjel Gabriel te María? Qo xnaqʼtzal tiʼj.

‹In xi nqʼolbʼena, nim t-xtalbʼil Dios ma tzaj tqʼoʼn teya›, chi anjel Gabriel. ‹Ate Jehová at tukʼila›. Bʼajxtaq tlonte María xjal lu. Tzaj bʼaj tkʼuʼj tuʼn jlu, tuʼnju mitiʼteq in nel tnikʼ tiʼ tajtoq anjel tuʼn ttzaj tqʼamaʼn te. Ok tqʼuqbʼaʼn naj anjel tkʼuʼj.

‹Miʼn xobʼa María›, chi anjel. ‹Quʼn ntzalaj Jehová tiʼje. Tuʼntzen jlu, ok kbʼel tbʼinchaʼn jun tbʼanel toj tanqʼibʼila. Tzul jun tala ex Jesús tbʼi kʼokel tqʼoʼna›.

Kukx xi tqʼamaʼn Gabriel jlu te María: ‹Nim toklen kʼwaʼl lu kokel; ex kʼokel qʼmaʼn tbʼi tKʼwaʼl Dios, aju Dios Nimxix toklen. Kxel tqʼoʼn Jehová toklen tuʼn tok te ajkawil ik tzaʼn te David. ¡Naqtzen tuʼnj kkawil Jesús te jumajx, ex aju tkawbʼil mintiʼ bʼajsbʼil te!›

Atzunte María xi tqanin te anjel: ‹¿Tzaʼn tten jlu? Quʼn weye naʼmx nmojeʼye tukʼil jun xinaq, ¿tzeʼn jaku tzaja jun wale?›

Xitzun ttzaqʼweʼn anjel: ‹Aju tipumal Dios kbʼel ten tibʼaja; kyjaʼtzun aju neʼ tzul itzʼj kʼokel tbʼi tKʼwaʼl Dios›. Tzaj tmaʼntl anjel te: ‹Naʼntza Elisabet aju at t-xilene tukʼe. In che yolintaq xjal tiʼj qa otaq tijin ex qa melayteq tzajtl tal. Ya chʼixtl tul itzʼji jun tal. Tzʼelxtzun tnikʼe tiʼj jlu, mintiʼ jun tiʼxti mlaywit bʼant tuʼn Dios›.

Xitzun tqʼamaʼn María te anjel: ‹¡Lu qine lu, aqine tmajen Jehová! Bʼant-xwit wiʼje tuʼn Dios ik seʼnx ma tmaya›. Eltzun tpaʼn tibʼ anjel tiʼj.

Xiʼnaj María tukʼe Elisabet. Tej tbʼinte Elisabet aju qʼolbʼebʼil te tuʼn María, jaw yukche tal neʼẍ tuj tkʼuʼj tuʼnjo ntzalajtaq. Noj tuj tanmi Elisabet tuʼn xewbʼaj xjan ex xi tqʼamaʼn te María kyjalu: ‹Mas ma kubʼ kʼiwlaʼna kyxol kykyaqil xuʼj›. Kyaj ten María chʼixmele oxe xjaw tukʼe Elisabet, ex ajtz juntl maj tuj Nazaret.

Chʼixtaq tpon ambʼil tuʼn tkubʼ mojeʼ María tukʼil jun xinaq José tbʼi. Tejtzen tok tbʼiʼn José qa tzul itzʼji jun tal María, kubʼ t-ximin qa melay kubʼ mojeʼtl tukʼil. Tzajtzun tqʼamaʼn t-anjel qMan Dios te: ‹Miʼn xobʼe tuʼn tok María te t-xuʼjila, quʼn tuʼn tipumal xewbʼaj xjan ma tzʼok ten tal›. E kubʼtzun mojeʼ María tukʼe José, ex e ayon tuʼn tul itzʼje Jesús.