JE CHJOÓN xosí naskánakji jéní María. Chjoón israelitaní, kʼoa ya naxinandá Nazaret tsʼe. Je Niná be kʼianga nʼio nda chjota María. Kuinga kisikasénsíni je ánkje Gabriel nga katafikjákao. A ʼyaní jméni xi kitsole Gabriel je María. Kataʼyala.

Je Gabriel kitsole: “ʼNdali, nʼio nda tísasénle Niná xi tʼatsi. Jeobá tíjnakaoli”. Je María nisañandiajinla be je chjota xokji. Koankjaojinle, nga tsín koanjinle jmeni xi kitsole. Tonga je Gabriel kjitʼanangi kisikʼéjnajyo.

Kitsole: “Ali nokjonjin, María. Nʼio tsjoa tjínle Jeobá xi tʼatsi. Kuinga ali tokʼoajinmali jmeni xi sʼin xi tʼatsi. Jngo ʼndílee sʼeli. Kʼoa Jesús kʼuinlai”.

Kʼoa Gabriel kitsosale: “Je ʼndíleexʼin jebi nʼio jeya koa̱n, kʼoa ʼNdíle Niná xi nʼio ngʼa tíjna kʼuinle. Rey sikʼéjna Jeobá, josʼin tsakʼejna je David. ¡Tonga Jesús rey koa̱n ngantsjai, kʼoa likuikʼia kjoetʼa nga koatexomason”.

Kitso María: “Jókoa̱nnile jebi. Nga kje bixanjian kʼoa a likui ʼya chjota tijnakoa, jósʼin nga jngo ʼndílee sʼenina”.

Kitso Gabriel: “Je nganʼiole Niná kjoaʼaili. Kuinga je ʼndíleexʼin xi jtsín ʼNdíle Niná kʼuin. A faʼaitsjenli xi tʼatsʼe je xíngi, je Elisabet. Je chjota kʼoakitso nga je nʼio jchínga nga tsínti koa̱n xti sʼenile. Tonga jeme sʼe jngole ʼndí. Nga Niná nijmejin xi tsín tsa koa̱nle kʼoasʼin”.

Kjitʼanangi i̱ kitso María: “¡Chjoón choʼndaleña je Jeobá! Kʼoakatama xi tʼatsʼan josí tisi”. Kʼoa xijekoan, ki je ánkje.

Je María kjoan kikonle je Elisabet. Kʼianga je kinrʼoé jta̱le María je Elisabet, je ʼndílee xi tíjnaya tsʼoa̱ ñaki kao kjoatsjoa kiskingʼa. Elisabet toxkia tse nganʼiotsje kisʼele kʼoa kitsole María: “Jiní xi nʼio tse kjoanichikontʼain tíbʼaili tikʼoajinni yánchjín xi ngikʼa”. Je María jan sá tsakʼejnakao je Elisabet kʼoa xijekoan, kʼia kini Nazaret.

Nga kʼia, je María jeme kuixankao jngo chjota xi José tsakʼin. Tonga kʼianga kisʼejinle José nga jngo ʼndílee sʼele je María, kʼoasʼin kisikjaʼaitsjen nga tsín ndatjín nga je kuixankao. Xijekoan, je ánkjele Niná kitsole: “Ali nokjonjin nga chjoónli katama je María. Nga jé Niná xi kʼoasʼin jngo ʼndí títsjoále”. Kʼoa kʼoasʼin chixan je María kao José, kʼoa kiskoya saʼnda nga kitsin Jesús.