ဒီမိန်းမချောလေးကတော့ မာရိပဲကွဲ့။ ဣသရေလအမျိုးသမီးဖြစ်ပြီး နာဇရက်ဆိုတဲ့မြို့မှာနေတယ်။ သိပ်ကောင်းတဲ့ မိန်းမကောင်းတစ်ယောက်ဖြစ်တယ်ဆိုတာ ဘုရားသခင်သိတယ်။ ဒါကြောင့်လည်း ကောင်းကင်တမန်ဂါဗြေလကို စေလွှတ်ပြီးပြောခိုင်းလိုက်တယ်။ ဂါဗြေလဟာ မာရိဆီလာပြီး ဘာပြောသလဲသိလား။ ကြည့်ရအောင်။

‘မင်္ဂလာနေ့မြတ်ပါ၊ အထူးမျက်နှာသာရတဲ့မိန်းကလေး၊ မင်းနဲ့အတူ ယေဟောဝါရှိတယ်’ ဆိုပြီး ဂါဗြေလကမာရိကိုနှုတ်ဆက်တယ်။ ဒီလူကိုမာရိတစ်ခါကမှ မမြင်ဖူးဘူး။ သူဘာကိုပြောနေမှန်းမသိတော့ သူမခမျာ လန့်သွားရှာတာပေါ့။ ဒါပေမဲ့ ဂါဗြေလက ချက်ချင်းပဲသူ့ကိုနှစ်သိမ့်လိုက်တယ်။

‘မာရိ၊ မကြောက်နဲ့။ မင်းဟာယေဟောဝါစိတ်တော်နဲ့ အင်မတန်တွေ့ပြီ။ ဒါကြောင့်မင်းအတွက် အင်မတန်မြတ်တဲ့ အလုပ်တစ်ခုလုပ်ပေးတော့မယ်။ မင်းဟာမကြာခင် ကလေးလေးတစ်ယောက်ရမယ်။ သူ့ကိုယေရှုလို့ မင်းနာမည်မှည့်ပေးရမယ်’ တဲ့။

‘ဒီကလေးဟာ ကြီးမြတ်တဲ့သူဖြစ်လာမယ်။ အမြင့်ဆုံးသောဘုရားသခင်ရဲ့ သားတော်လို့လည်း အခေါ်ခံရမယ်။ ယေဟောဝါဟာသူ့ကို ဒါဝိဒ်လို ဘုရင်ဖြစ်စေမယ်။ ဒါပေမဲ့ ယေရှုဟာ ထာဝရဘုရင်ဖြစ်မယ်။ သူ့နိုင်ငံလည်းဘယ်တော့မှ ကုန်ဆုံးမှာမဟုတ်ဘူး’ ဆိုပြီး ဂါဗြေလဆက်ပြီးရှင်းပြတယ်။

မာရိက ‘ဘယ်လိုလုပ်ဖြစ်နိုင်မှာလဲ။ ကျွန်မအိမ်ထောင်တောင် မပြုရသေးဘဲ။ ဘယ်ယောက်ျားနဲ့မှ ကျွန်မအတူမနေဖူးဘူး။ ဘယ်လိုလုပ်ပြီးကလေးရမှာလဲ’ ဆိုပြီးပြန်ပြောတယ်။

ဂါဗြေလက ‘ဘုရားသခင်ရဲ့တန်ခိုးတော် မင်းပေါ်သက်ရောက်မယ်။ ဒါကြောင့်မွေးလာမယ့်သားလေးကို ဘုရားသခင်ရဲ့သားလို့ခေါ်မယ်’ တဲ့။ ပြီးတော့မာရိကို ဆက်ပြောပြတယ်။ ‘မင်းအမျိုး ဧလိရှဗက်ကိုကြည့်လေ။ သူကလေးမွေးနိုင်တဲ့ အရွယ်လွန်သွားပြီ၊ အိုသွားပြီလို့လူတွေကပြောကြပေမဲ့ မကြာခင် သူသားကလေးတစ်ယောက်ရတော့မယ်။ တွေ့လား၊ ဘုရားသခင်မတတ်နိုင်တာ ဘာမှမရှိဘူး။’

ဒါနဲ့မာရိကချက်ချင်းပဲ ‘ကျွန်မဟာ ယေဟောဝါရဲ့ကျွန်မ ဖြစ်ပါတယ်။ ကိုယ်တော်မိန့်တော်မူတဲ့အတိုင်း ကျွန်မပေါ်မှာဖြစ်ပါစေ’ ဆိုပြီးပြန်ပြောတယ်။ ဒါနဲ့ ကောင်းကင်တမန်ထွက်သွားတယ်။

မာရိကလည်း ဧလိရှဗက်ဆီအပြေးအလွှားသွားတော့တာပေါ့။ မာရိရဲ့အသံကို ဧလိရှဗက်ကြားတဲ့အခါ ဧလိရှဗက်ဗိုက်ထဲမှာရှိတဲ့ကလေးလေးက ဝမ်းသာလို့ခုန်လိုက်တယ်။ ဧလိရှဗက်လည်း ဘုရားသခင့်ရဲ့ဝိညာဉ်တော်နဲ့ ပြည့်လာတယ်။ ပြီးတော့ မာရိကို ‘ညီမဟာမိန်းကလေးတွေထဲမှာ အမြတ်ဆုံးပါလား’ ဆိုပြီးပြောတယ်။ မာရိက ဧလိရှဗက်နဲ့အတူ သုံးလလောက်နေပြီးတော့ နာဇရက်မြို့ကိုပြန်သွားတယ်။

တကယ်ဆိုရင် မာရိဟာ ယောသပ်ဆိုတဲ့လူတစ်ယောက်နဲ့ လက်ထပ်တော့မယ့်ဆဲဆဲပဲ။ ဒါပေမဲ့ မာရိကလေးရတော့မယ်ဆိုတာ ယောသပ်ကြားရတဲ့အခါ သူ့ကိုလက်ထပ်ဖို့မကောင်းဘူးဆိုပြီး စိတ်ထဲဖြစ်လာတယ်။ အဲဒီအခါ ဘုရားသခင်ရဲ့ကောင်းကင်တမန်က ‘မာရိကိုယူဖို့ မကြောက်ပါနဲ့။ ဘာကြောင့်လဲဆိုတော့ သူ့ကိုကလေးလေးပေးတာဟာ ဘုရားသခင်ပါ’ ဆိုပြီးပြောတယ်။ ဒါနဲ့ မာရိနဲ့ယောသပ် လက်ထပ်လိုက်ကြတယ်။ ပြီးတော့ ယေရှုမွေးလာဖို့စောင့်နေကြတယ်။