Se ángel okitlajpaloto María
TLAPOUALISTLI 84
Se ángel okitlajpaloto María
NIN siuatl kuajkualtsin itoka María. Ye se siuatl israelita uan chanti itech altepetl Nazaret. ToTajtsin Dios kimati María se siuatl yolkuali. Ik non, kititlani iángel Gabriel pampa ma kitlapoui. ¿Tikmati tlen okilui ángel Gabriel María? Ma tikitakan.
Gabriel okilui: ‘Panolti, xipaki tejuatsin María, Jehová mouan yetok’. María amo keman okitak nin akin okitlajpaloto. Omotekipacho pampa amo okimatiaya tlen okinekiaya kiluis. Maski ijkon, Gabriel san niman okiyolseui.
Okilui: ‘María, amo ximomojti, pampa toTajtsin Dios tikyolpaktia. Ik non, mitschiuilis itlaj tlen tetlajtlachialtia. Ipan sekimej metstli tikpias mokonetsin. Uan tiktokayotis Jesús’.
Gabriel noijki okiyekilui: ‘Nin konetl ueyititos, uan kitokayotiskej iKone toTajtsin Dios tlen Ueyititok. Uan Jehová kitlalis ueyi tekiua ijkon ken David. ¡Maski ijkon, Jesús nochipa yetos tekiua, uan itekiuajkayo amo keman tlamis!’.
Ijkuakon, María okitlajtlani: ‘¿Ken uelis panos nochi nin? Tla ayamo nimonamiktia nion niyetok iuan se tlakatl, ¿ken uelis nikpias se konetl?’.
Ángel okilui: ‘Iespíritu toTajtsin Dios mopan uits. Ik non, konetsintli kitokayotiskej iKone toTajtsin Dios’. Noijki okilui: ‘Xikilnamiki mochanejka Elisabet. Nochtin okijtoayaj ye yokatka tenantsin pampa kipiaskia ikone. Maski ijkon, ye itech sekimej metstli kipias ikonetsin. Ik non, xikmati amo onka nion se tlamantli tlen toTajtsin Dios amo uelis kichiuas’.
San niman, María okinankili: ‘Ne niitekipanojki Jehová. Ma mochiua ijkon ken yotikijto’. Ijkuakon, ángel oyajki.
María san niman okitlajpaloto Elisabet. Ijkuak Elisabet okikak otlajto María, konetsintli tlen okatka ijtik Elisabet chikauak omolini pampa oyolpakik. Elisabet otenki ika espíritu santo uan okilui María: ‘ToTajtsin Dios okachi omitsteochi itech nochtin siuamej’. María omoka iuan Elisabet kanaj eyi metstli, uan ijkuakon omokuepki Nazaret.
María monamiktiskia iuan se tlakatl tlen omotokayotiaya José. Maski ijkon, ijkuak José okimatki María kipiaskia ikonetsin, ye okijto ayakmo iuan monamiktiskia. Ijkuakon, iángel toTajtsin Dios okilui: ‘Amo ximomojti timonamiktis iuan María. Pampa toTajtsin Dios ye akin kichiuas ma kipia ikonetsin’. Ijkuakon, María uan José omonamiktijkej, uan omochixkej ma nesi Jesús.
