Maraika Okutaayaayira Mariamu
Ekitebyo 84
Maraika Okutaayaayira Mariamu
OGU mukazi murungi ni Mariamu. N’Omuisraelikazi, orikutuura omu tauni ya Nazareesi. Ruhanga naamanya ngu n’omuntu murungi munonga. Niyo nshonga ahabwaki yayoheereza maraika we Gaburieli kugamba nawe. Noomanya eki Gaburieli yaija kugambira Mariamu? Ka twetegyereze.
Gaburieli amugira ati: ‘Shemererwa, iwe orikukundwa munonga, Yehova ari naiwe!’ Mariamu takareebahoga omuntu ogu. Atiina munonga, ahakuba tarikumanya eki arikumanyisa. Kwonka ahonaaho Gaburieli amuhuumuriza.
Amugira ati: ‘Otatiina, Mariamu, ahakuba otungire omugisha ahari Yehova. Egyo niyo nshonga ahabwaki arikuza kukukorera eky’okutangaaza. Nooza kuzaara omwana. Kandi noija kumweta Yesu.’
Gaburieli ayeyongyera kushoborora: ‘Omwana ogu naija kuba mukuru, kandi aryayetwa Omwana wa Rukira-Boona. Yehova aryamuhindura omugabe, nk’oku Daudi yaabaire ari. Kwonka Yesu naija kuba omugabe ebiro byona, kandi obukama bwe tiburihwaho!’
Mariamu abuuza ati: ‘Ekyo nikibaasika kita? Ka ntakashweirwe, kandi ka ntaine mushaija, mbwenu nimbaasa nta kuzaara omwana?’
Gaburieli amugarukamu ati: ‘Amaani ga Ruhanga garyakwizira, n’ahabw’ekyo omwana aryayetwa Omwana wa Ruhanga.’ Kandi agaruka agambira Mariamu ati: ‘Ijuka omunyabuzaare waawe Elizaabeesi. Abantu bakagira ngu akaikwire munonga okubaasa kuzaara omwana. Kwonka nawe ari haihi kuzaara omwana w’omwojo. Mbwenu nooreeba, tihaine ekirikurema Ruhanga kukora.’
Ahonaaho Mariamu agira ati: ‘Reeba, ndi omuzaana wa Yehova! Kimbeho nk’oku waagamba.’ Maraika amutsigaho agyenda.
Mariamu ayehuuta aza kutaayaayira Elizaabeesi. Elizaabeesi ku ahurira eiraka rya Mariamu, omwana ow’omunda ye agurukaguruka ahabw’okushemererwa. Elizaabeesi aijura omwoyo orikwera kandi agambira Mariamu ati: ‘Omu bakazi boona niwe oheirwe omugisha.’ Mariamu aguma na Elizaabeesi kumara ameezi nk’ashatu, kandi bwanyima agaruka owaabo Nazareesi.
Mariamu ari haihi kushwerwa omushaija orikwetwa Yosefu. Kwonka Yosefu ku amanya ngu Mariamu aine enda, atekyereza ngu tashemereire kumutaatsya. Maraika wa Ruhanga nikwo kumugira ati: ‘Otatiina kutaatsya mariamu kuba omukazi waawe. Ahakuba ni Ruhanga omuhaire omwana w’omwojo. N’ahabw’ekyo, Yosefu ataatsya Mariamu, kandi barinda Yesu okuzaarwa.
