WAJUN jeʼlikalaj ali are María. Aj israelita, xuqujeʼ kʼo pa ri tinamit rech Nazaret. Ri Ajawaxel retaʼm che jun sukʼalaj winaq. Rumal laʼ xutaq lo ri uʼangel ubʼiʼ Gabriel che uchʼabʼexik. ¿La awetaʼm su xubʼij Gabriel che María? Chqilampeʼ su xubʼij che.

‹Saqarik, toqʼobʼisan awäch rumal ri Ajawaxel›, xchaʼ ri Gabriel che. ‹Ri Jehová kʼo awukʼ.› María rilom ta uwäch wajun winaq riʼ. Rumal laʼ xuxibʼij ribʼ, rumal che retaʼm täj su kraj kubʼij ri ángel. Tekʼuriʼ ri Gabriel xubʼij che, che kuxibʼij ta ribʼ.

‹Xaq maxibʼij awibʼ María›, xchaʼ. ‹Ri at ariqom ri utoqʼobʼ ri Jehová. Rumal laʼ kubʼan jun utz awukʼ. Kkʼejeʼ na jun alaj awal. Rajawaxik kakoj Jesús che ubʼiʼ.›

Gabriel xubʼij chi wariʼ che: ‹Ri alaj akʼal kubʼan na nim, xuqujeʼ kbʼix Ukʼojol ri Nimalaj Ajawaxel che. Jehová kubʼan ajawinel che junam che xubʼan David. ¡Ri Jesús kubʼan ajawinel kʼot ukʼisik, ri rajawbʼäl kkʼis täj!›

‹¿Su ubʼanik ronojel wariʼ?› Xchaʼ María. ‹In kʼulan täj xuqujeʼ inkʼolnäq ta rukʼ jun achi, ¿su kinbʼano che kkʼejeʼ jun wal?›

‹Rumal che kpe ri uchoqʼabʼ ri Ajawaxel pawiʼ›, xchaʼ Gabriel. ‹Rumal laʼ ri akʼal kbʼix Ukʼojol ri Ajawaxel che.› Xchaʼ che: ‹Musach pa ajolom ri afamiliar Elisabet. Ri winaq kkebʼij che riʼj winaq chik rech kkʼejeʼ ral. Tekʼuriʼ kkʼejeʼ na jun ral. Rumal laʼ kawilo che ri Ajawaxel ronojel kkunik kubʼano›.

María xubʼij wariʼ: ‹¡In rajpatanel ri Jehová! Kwaj kinbʼan ri kabʼij›. Tekʼuriʼ ri ángel xbʼek.

María xbʼe che urilik ri Elisabet. Chiʼ Elisabet xuta ri uchʼabʼal ri María, ri neʼ kʼo chupam Elisabet sibʼalaj xkikotik. Rumal ri ixlabʼixel (espíritu santo) ri Elisabet xubʼij che María: ‹At tewchim na che kiwäch konojel ri ixoqibʼ›. María xkanaj kan oxibʼ ikʼ rukʼ Elisabet, tekʼuriʼ xtzalij Nazaret.

Kebʼ oxibʼ täq qʼij kraj che María kkʼuleʼ rukʼ jun achi ubʼiʼ José. Tekʼuriʼ chiʼ José xuto che María kkʼejeʼ jun ral, kraj ta chik kkʼuleʼ rukʼ. Rumal laʼ ri uʼangel ri Ajawaxel xubʼij: ‹Xaq maxibʼij awibʼ che katkʼuleʼ rukʼ María. Rumal che, are ri Ajawaxel xuya jun ral ri María›. Rumal laʼ María rukʼ José xekʼuleʼik, tekʼuriʼ xkeyej che kkʼejeʼ ri Jesús.