CHAY buenamoza warmiqa Maria sutiyoqmi. Payqa Israel casta warmim, hinaspa Nazaret llaqtapim yacharqa. Mariaqa Diospa agradonpaqmi karqa. Chaymi Diosqa kacharqa angel Gabrielta watukamunanpaq. ¿Yachankichu imatam angel Gabrielqa Mariata nirqa? Qawasunchikyá.

Angel Gabrielmi nirqa: ‘Rimaykullayki Diospa favorecesqan Maria, Jehová Diosmi qanwan kachkan’ nispa. Mariaqa manam chay runataqa reqsirqachu. Angelta uyariykuspanmi mana imanakuytapas atispan sonqollanpi tapukurqa chay rimaykusqanmanta. Chayllam angel Gabrielqa kallpancharqa.

Angelñataqmi niykurqa: ‘Ama manchakuychu Maria, Jehová Diospa favorecesqanmi karunki. Chaymi kusirikunaykipaq kaqtam ruranqa. Wiksayakuspaykim wachakunki qari wawata, paytam sutichanki Jesuswan’ nispa.

Angel Gabrielqa nillarqataqmi: ‘Ancha reqsisqa kaspanmi Hanaq pachapi Diospa Churinwan sutichasqa kanqa. Jehová Diospunim rey kananpaq churanqa ñawpaq abuelon Davidta hina. ¡Jesusmi ichaqa wiñaypaq gobiernanqa, gobiernonqa manam tukunqachu!’ nispa.

Hinaptinmi Mariañataq tapurqa: ‘Manaraq qariwan kachkaspayqa ¿imaynataq wawayoqqa kayman?’ nispa.

Chaymi angelñataq nirqa: ‘Diospa atiyninmi puyu hina pampaykusunki. Chayraykum naceq wawapas sutichasqa kanqa Diospa Churinwan.’ Chaymantapas nirqataqmi: ‘Qolloq nisqanku aylluyki Elisabetpas yuyaqña kachkaspapas soqta killañam qari wawata wiksayakurun. Chaymi Diospaqqa manam imapas sasaqa kanchu’ nispa.

Hinaptinmi Mariañataq nirqa: ‘Jehová Diospa sirvientallanmi ñoqaqa kani. Nisqaykipi hinayá ñoqawan rurasqa kachun’ nispa. Hinaptinmi angel pasakurqa.

Mariañataqmi chay punchawkunallapi Elisabetta watukuq rirqa. Mariapa rimaykusqanta uyariruptillanmi Elisabetpa wiksanpi wawa kuyurirurqa. Elisabetman Chuya Espiritu huntaykuptinmi Mariata nirqa: ‘Wakin warmikunamanta astawan favorecesqam qamqa kanki’ nispa. Mariam Elisabetwan yaqa kimsa killa karispan Nazaretman kutikurqa.

Mariaqa Joseywan casarakunanpaq rimapayasqaña karqa. Ichaqa Maria wiksayakusqanta Josey yacharuspanmi, paywan manaña casarakunanpaq piensachkarqa. Hinaptinmi Diospa angelnin nirqa: ‘Ama manchakuychu Mariawan casarakuyta, payqa wiksayakurun Chuya Espiritupa atiyninwanmi’ nispa. Chaymi Joseyqa Mariawan casarakurqa, hinaspa wawan wachakunankama suyarqaku Jesuswan sutichanankupaq.