FETO oin-furak ida-neʼe mak Maria. Nia ema Izraél, neʼebé hela iha sidade Nazaré. Maromak hatene katak nia feto diʼak tebes. Tan neʼe, Maromak haruka nia anju naran Gabriel atu koʼalia ho nia. Hatene liafuan saida mak Gabriel hatoʼo ba Maria? Mai ita haree.

Gabriel hatete: ‘Loron diʼak, feto neʼebé hetan grasa boot. Jeová hamutuk ho Ita.’ Uluk, Maria nunka haree ema neʼe. Nia laran-taʼuk, tanba nia la komprende liafuan sira-neʼe dehan katak sá. Maibé, Gabriel halakon Maria nia laran-taʼuk.

Nia hatete: ‘Keta taʼuk, Maria, Jeová kontente ho Ita. Tan neʼe nia sei halo milagre diʼak ida ba Ita. Lakleur tan, Ita sei iha oan ida. Ita sei hanaran nia Jesus.’

Gabriel hatutan: ‘Oan neʼe sei sai ema-boot, ema sei bolu nia Maromak Aas Liu Hotu nia Oan. Jeová sei halo nia nuʼudar liurai hanesan David. Maibé, Jesus sei sai liurai ba nafatin, ninia ukun sei la iha rohan!’

Maria husu: ‘Oinsá mak buat sira-neʼe bele akontese? Haʼu seidauk kaben. Haʼu seidauk moris hamutuk mane ida, nuneʼe oinsá mak haʼu bele iha oan?’

Gabriel hatán: ‘Maromak nia kbiit sei hamahan Ita. Nuneʼe, oan neʼe sei bolu nuʼudar Maromak nia Oan.’ Depois neʼe, nia hatete ba Maria: ‘Hanoin toʼok kona-ba Ita-nia maluk Elisabete (ka Isabel). Ema hatete katak nia ferik demais ona atu koʼus oan. Maibé lakleur tan, nia sei iha oan. Tanba ba Maromak, la iha buat ida neʼebé la bele halo.’

Maria hatete kedas: ‘Haʼu mak Jeová nia atan-feto! Mosu deʼit bá tuir Ita-nia liafuan.’ Depois, anju neʼe fila fali.

Maria bá lalais atu vizita Elisabete. Kuandu Elisabete rona Maria nia lian, bebé neʼebé iha Elisabete nia knotak haksoit ho ksolok. Elisabete, nakonu ho Maromak nia espíritu hodi hatete ba Maria: ‘Ita mak hetan bensaun espesiál iha feto hotu nia leet.’ Maria hela ho Elisabete maizumenus fulan tolu nia laran, depois fila fali ba Nazaré.

Maria besik atu kaben ho mane ida naran José. Maibé, kuandu José rona katak Maria atu iha oan, nia hanoin atu la kaben ho Maria. Depois, Maromak nia anju hatete ba José: ‘Keta taʼuk atu simu Maria nuʼudar Ita-nia feen. Maromak mak halo milagre atu nia koʼus oan neʼe.’ Nuneʼe Maria no José kaben, no sira hein ba Jesus nia moris.