ABERU na abucel na nges Mariam. Erai Asiraelit, naiboye kore Nasaret. Ejeni Edeke ebe erai ngesi itunganan yenejok. Ngun ejukunia ekemalaika Gaburiel ener kanges. Ijeni ijo nuebunit Gaburiel alimokin Mariam? Aanyutu ber oni.

Kotema Gaburiel nges: ‘Yoga, naisirerengitai noi, ejai Yawe kajo!’ Mam lem Mariam eanyutor etunganan lo. Kiyalongong, naarai mam ejeni inyo bo epeleikit ngesi. Konye kisinapik Gaburiel nges kanepekanen.

Kobala ngesi: ‘Sirikiyong, Mariam, elakara Yawe noi kajo. Ngupengun elosio ngesi aiswamaikin ijo nuaumokin. Ibuni aidoun ikoku. Imaikini ekekiror Yesu.’

Kiyatak Gaburiel einer: ‘Eraun ikoku yen lokapolon, enyarao Okoku loka Edeke Loejai Kuju kakuj. Itarauni Yawe nges ekabaka kwape kolo Daudi. Konye eraun Yesu ekabaka ikar kere, akejakanut da mam enangi!’

Ingit Mariam: ‘Ikwaikinete bo ai nu kere? Mam adukokina. Mam kiboit kekilokit, aso apedori biai auruun ikoku?’

Kobongok Gaburiel: ‘Kidoikini jo agogong naka Edeke, aso enyarao ikoku okoku loka Edeke.’ Kosodi alimokin Mariam: ‘Kiitu apajanakon Elisabet. Abalas itunga ebe emojongit noi mam epedori auruun ikoku. Konye edodor auruun esapat. Aso koany ijo, emamei ibore mam Edeke epedori aswam.’

Kanepekanen kotema Mariam: ‘Arai eong abulesit naka Yawe! Kiswamaikinos eong kwape ibalar ijo.’ Konyouni emalaika.

Kisunyak Mariam alosit aipejokin Elisabet. Kiira Elisabet eporoto loka Mariam, kosukor ikoku kakoik naka Elisabet kanuka aiyalama. Kilelebai Elisabet kede emoyo loka Edeke, kosodi alimokin Mariam: ‘Isirerengitai ijo kotoma angor.’ Iboyoto Mariam kede Elisabet adaun ilapio bala iuni, kosodi abongor ore Nasaret.

Eyapie Mariam adukokin etunganan loanyaritai Yosep. Konye kisisiau Yosep ebe elosi Mariam aidoun ikoku, mam eomit ebe ibusakinit aimany nges. Kosodi emalaika loka Edeke alimokin nges: ‘Mam ikuriana ayangar Mariam kwape akoniberu. Erai Edeke einaki nges esapat.’ Aso kodukokinos Mariam ka Yosep, ido kidarakis aurunio naka Yesu.