84-нҗи хекая

Перишде Меръемиң янына гелйәр

БУ ОВАДАН гызың ады Меръем. Бу ысрайыллы гыз Насыра шәхеринде яшаяр. Худай онуң асыллы гыздыгыны билйәрди. Шонуң үчин Худай онуң билен гүрлешмәге Җебрайыл перишдәни иберйәр. Гел, Җебрайыл перишдәниң Меръеме нәме диенини билели.

Перишде Меръеме:

— Салам, эй гөзел гыз! Ехова сениң билен — диййәр. Меръем перишдәни өң гөрмәнди. Меръем онуң нәме дийҗек болянына дүшүнмән алҗыраяр. Эмма Җебрайыл перишде шобада оны көшешдирйәр:

— Горкма, Меръем. Сен Худайдан мерхемет тапдың. Шол себәпли хем Худай сениң үчин бир тәсин зат этмекчи. Сениң оглуң болар, онуң адына Иса дакарсың — диййәр. Соңра перишде оңа:

— Ол улы болар, Оңа хеммелерден Бейик Худайың Оглы дийлер. Ехова оны Давут ялы патыша эдер. Йөне Иса бакы патышалык эдер, патышалыгының соңы болмаз! — диййәр.

Меръем перишдә:

— Бу нәхили болар? Мен әре бармасам, эркек адам билен яшамасам, менден нәдип чага болар? — дийди.

Җебрайыл перишде:

— Худайың гүйҗи сениң үстүңе инер, шонуң үчин хем догулҗак чага Худайың Оглы дийлер. Ине, гарындашың Элизабети ядыңа сал. Адамлар оңа чага догрардан гарры диййәрдилер. Эмма басым онуң оглы болар. Гөрйәңми, Худайың башармаҗак зады ёкдур — диййәр.

Меръем:

— Ине, мен Ехованың гырнагы. Маңа сениң айдышың ялы болсун — дийип, дессине ылалашяр. Перишде болса гөзден йитйәр.

Меръем Элизабетиң янына бармага ховлугяр. Элизабет Меръемиң саламыны эшиденде, гөвресиндәки чага шатлыкдан яңа бөкүп башлаяр. Элизабет Худайың рухундан долуп, шатлык билен: «Сен аяллар ичинде багтлысың» дийди. Меръем Элизабетлерде үч ая голай болуп, соңра өйүне гайдяр.

Тиз вагтдан Меръем Юсуп атлы бир адама дурмуша чыкмалыды. Эмма Юсуп Меръемиң гөврелидигини эшиденде, оңа өйленмеҗек боляр. Шонда Худайың перишдеси оңа: «Сен Меръеме өйленмекден горкма, оңа Худай огул берди» диййәр. Шонуң үчин Юсуп Меръеме өйленйәр. Олар Исаның догулмагына гарашярлар.

Лука 1:26—56; Матта 1:18—25.