Makani 84: Mungelo Wamuswaya Maliya
OOYU mukaintu uutaliboteli ngu Maliya. Muna Isilayeli uukkala mumunzi wa Nazaleta. Leza ulizyi kuti mukaintu ooyu mubotu moyo. Nkakaambo kaako ncaatumina mungelo Gabuliyele kuti aambaule anguwe. Hena ulicizyi Gabuliyele ncaaboolela kuzyi kwaambila Maliya? Atubone.
Gabuliyele wati kuli Maliya: ‘Wabonwa musimbi iwe ooyandwa kapati, Jehova ulaanduwe.’ Maliya taku naakamubwenyi muntu ooyu. Wayoowa nkaambo tacizyi ncaamba. Cakutasowa ciindi, Gabuliyele wamutontomeka.
Wati: ‘Utayoowi Maliya! Jehova wakukkomanina kapati. Nkakaambo kaako ulakucitila cintu cibotu. Ino-ino uya kuba amwana. Alimwi ukamuulike kuti Jesu.’
Gabuliyele wapandulula wati: ‘Mwana ooyu uya kuba mupati alimwi uya kwiitwa kuti Mwana wa Leza Mupatikampatila. Jehova uya kumupa kuti abe mwami mbuli bwakali Davida. Pele Jesu uya kuba mwami kukabe akutamani, alimwi abwami bwakwe taku nibuya kumana.’
Maliya wabuzya kuti: ‘Ino mbuti mbocikonzya kucitika eeci? Alimwi mebo tandikwetwe pe. Sinaona amusankwa, aboobo ino mbuti mbondikonzya kuba amwana?’
Gabuliyele waingula kuti: ‘Nguzu zya Leza ziya kuba alinduwe. Aboobo mwana uya kwiitwa kuti Mwana wa Leza.’ Kumane waambila Maliya kuti: ‘Koyeeya Elizabeta wamukowa wako. Bantu bakali kwaamba kuti wakali cembade kapati cakuti takonzyi kuba amwana. Pele ino-ino uya kuba amwana musankwa. Tee wabona, taku cintu ciyumu kuli Leza.’
Mpamunya Maliya wati: ‘Ndili muzike musimbi wa Jehova! Acicitike kuli ndime mbuli mbowaamba.’ Kumane mungelo waunka.
Maliya cakufwambaana waunka kwaakuswaya Elizabeta. Elizabeta naamvwa ijwi lya Maliya, mwana mwida lya Elizabeta wasotoka cakukondwa. Elizabeta wanjilwa muuya wa Leza. Wati kuli Maliya: ‘Iwe ulaacoolwe akati kabamakaintu boonse.’ Maliya wakkala a Elizabeta kwamyezi yotatwe, amane wajokela kumunzi ku Nazaleta.
Maliya ulangilwa kukwatwa kumusankwa wazina lya Josefa. Pele Josefa naazyiba kuti Maliya ulaada, walengaana kumukwata. Amane mungelo wa Leza wamwaambila Josefa kuti: ‘Utayoowi kubweza Maliya kuba mukaintu wako. Nkaambo ngu Leza wamupa kuti amite.’ Aboobo Maliya a Josefa bakwatana, lino baile kulindila kuti Jesu azyalwe.
Luka 1:26-56; Matayo 1:18-25.
Mibuzyo
- Ngwani mukaintu uuli acifwanikiso?
- Ncinzi Gabuliyele ncaambila Maliya?
- Mbuti Gabuliyele mbwapandulula kuli Maliya kuti uya kuba amwana nokuba kuti taku naakoona amusankwa?
- Ncinzi cacitika Maliya naamuswaya Elizabeta wamukowa wakwe?
- Ino wayeeya buti Josefa naazyiba kuti Maliya uya kuba amwana, alimwi nkaambo nzi walengaana kumukwata?
Mibuzyo aimwi
- Bala Luka 1:26-56.
Mbuti Luka 1:35 mbwatondezya kutajanika kwakutalondoka kuli koonse kwa Adamu muji lya Maliya ciindi buumi bwa Mwana wa Leza nibwakalonzyegwa kuzwa kubusena bwamuuya? (Hag. 2:11-13; Joh. 6:69; Heb. 7:26; 10:5)
Mbuti Jesu mbwaakalemekwa neciba ciindi katanazyalwa? (Lk. 1:41-43)
Ncikozyanyo nzi cibotu ncapa Maliya ku Banakristo basunu bapegwa zyoolwe zyaalubazu zyamulimo? (Lk. 1:38, 46-49; 17:10; Tus. 11:2)
- Bala Matayo 1:18-25.
Nikuba kuti izina lya Imanuweli tiilyakali zina limugemi Jesu, mbuti mulimo wakwe kali muntu uulya maila mbowakazuzikizya ncolyaamba? (Mt. 1:22, 23; Joh. 14:8-10; Heb. 1:1-3)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Milumbe Yobilo Iizwa Kuli Leza
Mungelo Gabriyeli wakaamba milumbe yakali kukatazya kusyoma.
TUKKAADI TWAAMBA ZYABANTU BAMU BBAIBBELE
Kakkaadi Kamu Bbaibbele ka Mariya
Amwiiye Mariya nkwaakamutola Jesu ciindi naakajisi mazuba aali 40 aakuzyalwa. Amusimbe, mutendulule, akukayobola kakkaadi kamu Bbaibbele aaka.
AMWIIYE LUSYOMO LWABO
Mariya—“Bona, Mebo Ndili Muzike wa Jehova!”
Ino bwiinguzi bwa Mariya kumungelo Gabriyeli bwakayubununa nzi kujatikizya lusyomo lwakwe? Ino mbube nzi abumwi buyandika mbwaakatondezya?
