JA TSAMAL ixuk it jaʼa María. Ja yeʼn israʼelenya sok ti kulan bʼa xchonabʼil Nazaret. Dyos wa snaʼa ja yeʼn jun lekil ixuk ja yuj sjeka ja yanjel Gabriel bʼa ay jas oj waj yal yabʼ. ¿Wan maʼ xa naʼa jasa wan yaljel yabʼi?

Gabriel yala: «Saʼan, María, ja Jyoba tini aya moka yujni ja yeʼn stsaʼawata». Ja María mini bʼa yilonejuk jun winik jastal yeʼn. Och spensar yujni mi xyabʼ stojolil jasa wan aljel yabʼi. Pe ja Gabriel ya kulan skʼujol.

Yala: «Mok xiwan, María, ja Jyoba jel lek xyilawa, ja yuj oj skʼul jun jasunuk mi bʼa ilubʼaluk bʼa weʼna. Ojni ajyuk jun awal sok oja wa sbʼiʼiluk Jesús».

Gabriel wani xcholjel yabʼ ja María: «Ja yal keremi jel niwan oj wajuk ja xcholi, sok oj najuk sbʼaj yunin Dyos ja maʼ jel niwani. Jyoba oj ya och mandaranum, jastal skʼulan mandar ja David. ¡Pe ja Jesusi oj och mandaranum bʼa juntiro soka smandaraneli mi oj chʼakuk!».

Ja María sjobʼo: «¿Jastal oj bʼobʼuk ja it? Ja keʼn mi nupanelukon sok mi ajyelukon sok jun winik, ¿jastal modo oj bʼobʼ ajyuk jun kal?».

Gabriel yala: «Ja yip ja Dyosi oj koʼukabʼaj, ja yuj ja yal keremi oj kʼot najuk sbʼaj yunin Dyos». Anto cho yala yabʼ: «Ajuluk akʼujol ja wa prima Elisabet. Ja yeʼn wa x-alji sbʼaj mixa xbʼobʼ yil yuntikil yuja sjabʼili, pe ojxtani ajyuk jun yal skerem. Ja yuj ti waxa wila ja Dyos mini jas mi xbʼobʼ skʼuluk».

Tixta yala ja María: «¡Yaʼtijumon ja Jyoba! Ja yuj aʼekʼ jbʼaj jastal ni waxa wala». Anto ja anjeli ti waja

María tixta stulu yi ja sbʼejyel bʼa oj waj yulatay ja Elisabet. Yajni Elisabet yabʼ ja skʼumal ja María, ja yal alats tey bʼa slukumi kʼe snik sbʼaj. Elisabet ti bʼut sbʼaj ja yip ja Dyos sok yala yabʼ ja María: «Ja bʼa spetsanil ja wa moj ixukili, kechani weʼn tsaʼubʼala». María ti ajyi sok oxe ixaw ja Elisabet sok tixa kumxi bʼa Nazaret.

María ojxta nupanuk sok ja winik sbʼiʼil José. Pe yajni ja José yabʼ ja María oj ajyuk jun yal, yala mixa oj bʼobʼ nupanusok. Anto ja yanjel ja Dyosi yala yabʼ: «Mok xiwan oj awi ja María bʼa oj acheʼumuk, pes yeʼnani ja Dyos ja maʼ yalunej oj yil jun yal skerem». Ja yuj ja José soka María nupaniye sok smajlaye oj pojkuk ja Jesusi.