UMA lu xastlan tsumat xtukuwani María. Uma tsumat li Israel chu kxchik anta wi kkachikin wanikan Nazaret. Dios katsiy pi uma tsumat tlan likatsi. Wa xlakata malakgachalh xʼángel Gabriel xlakata natachuwinan. ¿Katsiya wix tuku wanilh Gabriel María? Naʼakxilhaw.

Gabriel wan: Tlen María, Dios lu xatlan tsumat akxilhan chu lu paxkiyan. María nikxni aʼxakxilha uma chixku. Chu nixkatsiy la nakgalhtiy xlakata nikatsiy tuku waniputun. Pero Gabriel makgtayalh xlakata ni napekuan.

Gabriel waniy María: Ni kapekuanti. Jehová lu snun paxkiyan. Chu Dios natlaway tuku nila tamakanajlay. Nialh makgas nakgalhiya aktsu skgata. Chu Jesús nawiliniya xtukuwani.

Gabriel na wanipa María: Uma aktsu kgawasa lanka nawan chu xKgawasa Dios Jehová Xalatalhman nawan. Jehová mapakgsina natlaway, chuna la xwi David. ¡Pero Jesús nikxni katisputli xtamapakgsin!

María kgalhskininalh: ¿La chuna nakiakgspulay? Nitu ktamakgaxtokgnit chu nitu ktawi chatum chixku, ¿la tlan nakkgalhiy kiskgata?

Gabriel wan: Kaj xlakata xlitliwakga Dios. Wa xlakata uma aktsu skgata xKgawasa Dios nawan. Kalakapastakti minparienta Elisabet. Wakg kristianos xwankgoy pi ay xlina kata chu nialhla katikgalhilh skgata. Pero nialh makgas nakgalhiy aktsu kgawasa. Wa xlakata ay katsipat pi ni anan tuku Dios nila natlaway.

Akxni chuna wanikgoka María kgalhtinalh: ¡Akit kskujni Jehová! Chuna kalalh chuna la wix wana. Akxni chuna kgalhtinalh, ángel alh.

María lakapara lakgalh Elisabet. Akxni Elisabet kgaxmatli pi María chuwinalh akxni chalh, aktsu skgata nema xtajuma kxpan Elisabet tatsuwilh xlakata paxuwalh. Elisabet litatsamalh espíritu santo chu wanilh María: Wix tlakg makgamakglhtinanita xtasikulunalin Dios xliwakg lakpuskatin. María kimakgtayalh Elisabet max akgtutu papaʼ chu taspitli kNazaret.

María nialh makgas natatamakgaxtokga chatum chixku xtukuwani José. Pero akxni José katsilh pi María nakgalhiy chatum skgata, lakpuwan pi nitlan natatamakgaxtokga. Akxni tama kilhtamaku xʼángel Dios waniy: Nitu kapuwanti, minpuskat katlawa María. Wa xlakata pi Dios natlaway nakgalhiy chatum aktsu kgawasa. Wa xlakata José chu María latatamakgaxtokgkgolh chu la uku kgalhimakgolh pi nalakachin Jesús.