БО чараш херээжен кижиниң адын Мария дээр. Ол Назаре́т хоорайдан изра́ильчи херээжен-дир. Ол дыка эки деп, Бурган билир. Ынчангаш ооң-биле чугаалажыр кылдыр, дээрниң төлээзи Гаврии́лди ол чоргускан. Гаврии́л Марияга чүнү дыңнаткан ирги? Билип алыылам.

— Экии, тускай ачы-буянны чаалап алган кыс,— деп, дээрниң төлээзи Марияны мендилээн.— Иегова сээң-биле.— Мария ооң мурнунда ону кажан-даа көрбээн. Чүге ынча деп турарын билбейн, ол дүвүреп турар. Ынчалза-даа Гаврии́л ол дораан ооң айыылзынып турар байдалын оожургаткан.

— Кортпа, Мария,— деп, ол харыылаан.— Иеговага таарышкан сен. Ынчангаш ол сеңээ бир-ле кайгамчык чүүл кылырын күзеп турар. Удавас төлдүг болур сен. Ооң адын Иисус деп адап алыр сен.

Гаврии́л тайылбырлаарын уламчылаан: ‘Бо төл улуг алдарлыг кижи болур, ону Өндүр бедик Бурганның Оглу деп адаар. Иегова ону Дави́д кандыг турганыл, шак ындыг хаан кылып каар. Ынчалза-даа Иисус мөңге чагырар база чагыргазының төнчүзү турбас!’

— Ол бүгү канчап ындыг болур?— деп, Мария кайгап айтырган.— Мен ашакка барбаан болгай мен. Эр кижи-биле чурттаваан мен — ындыг болза канчап төлдүг болур кижи мен?

— Бурганның күжү сенче дүжер,— деп, аңаа Гаврии́л тайылбырлаан.— Ынчангаш төлдү Бурганның Оглу деп адаар,— дээш немээн:— Төрелиң Елисаве́таны сактып кел даан. Кижилер ону кырган, ажы-төлдүг болур хире эвес деп турган. Ынчалза-даа ам удавас ол оолдуг болур. Көрден — Бурганның черле шыдавас чүвези чок.

Мария ол-ла дораан чөпшээрээшкен: ‘Мен — Иегованың кулу мен! Мээң-биле, шупту сээң чугаалааның-биле болзун!’ Ынчан дээрниң төлээзи чиде берген.

Мария Елисаве́таже далажыпкан. Елисаве́та Марияның үнүн дыңнап каарга, Елисаве́таның иштинде төлү өөрүп шурап эгелээн. Бурганның ыдыктыг сүлдезинге башкартып, Елисаве́та ыыткыр чугаалаан: ‘Херээжен улус аразындан эң-не улуг йөрээл алган сен’. Мария Елисаве́тага үш ай хире аалчы бооп турар, а ооң соонда Назаре́тче чанып келген.

Мария Иосиф деп кижиге кадай кылдыр баар ужурлуг. Ынчалзажок Мария уруглуг болур деп билип кааш, Иосиф ону кадай кылдыр албас дей берген. Ынчангаш Бурганның дээрде төлээзи аңаа чугаалаан: ‘Марияны кадай кылдыр алырындан кортпа. Чүге дизе ол оолду Бургандан алган’. Ынчан Мария биле Иосиф өгленип алгаш, Иисустуң кажан төрүттүнерин манап эгелээн.