TE TʼUJBIL achʼix ini jaʼ te Mariae. Jaʼ jtul israel achʼix te kuxin ta jpam lum te Nazaret sbiile. Snaʼoj Dios te jaʼ kʼax lekil achʼix stukele. Jaʼ yuʼun la stikun bael jtul chʼul abat ta skʼoponel te Mariae. ¿Yabal anaʼ te bin la yichʼ albeyel yuʼun te chʼul abat Gabriele? Yame jnoptik bael.

Jich albot yuʼun te chʼul abate: Tal jpatbat awoʼtan, jaʼat te kʼuxultaybilat yuʼun te Jehovae, sok te jokimbilat yuʼune. Te María maʼyuk bin ora yiloj te machʼa-a ini. Bayal bin la snop ta yoʼtan yuʼun, melel ma la snaʼ te bin swentail te jich kʼoponot yuʼune. Jaʼukmeto albot yuʼun te chʼul abat te manchuk ya smel yoʼtane.

Mame xiwat María, bayalme yutsil yoʼtan Jehová awuʼun. Jaʼ yuʼun ayme bin chajpnax ya xkʼot ta pasel ta atojol. Yame x-ayin jtul awal, yame awakʼbey sbiilin Jesús.

Jich yak ta xcholelxan te chʼul abate: Te alal kerem ini mukʼme skʼoplal ya xkʼot, sok ya x-akʼbot sbiilin sNichʼan Dios te Machʼa ay ta toyole. Yame x-akʼot ta ajwalil yuʼun te Jehovae, jich bitʼil te Davide. ¡Jaʼnax yuʼun sbajtʼel kʼinal ya xkʼot ta ajwalil stukel te Jesuse, sok maʼyuk slajibal te wentainel yuʼune!

Jich la sjojkʼoy te Mariae: ¿Bin utʼil ay-a ini? Melel maba nujpunemon, sok maba yakon ta kuxinel sok jtul winik. ¿Bin utʼil ay-a te ya jta jtul alale?

Jich la yal te chʼul abat Gabriel: Yame xjul ta atojol te yaxinal yuʼel te Diose. Jich yuʼun te alal kerem ya x-ayine sNichʼan Dios sbiil ya xkʼot. Sok albotxan yuʼun: Julukme ta awoʼtan te Elisabet te ay bin awutoje. La yichʼ albeyel yuʼun te ants winiketik te kʼax meʼelixlaj yuʼun te yato sta yale. Jaʼukmeto nopolme ya x-ayinix jtul yal, melel maʼyuk te bin ma xjuʼ yuʼun spasel te Diose.

Jich la yal ta oranax te Mariae: ¡Yabaton te Jehová! Akʼa kʼotuk ta pasel ta jtojol te bin la awalixe. Jich sujt bael te chʼul abate.

Jich ora bajtʼ te María ta yuʼlatayel te Elisabete. Kʼalal te Elisabet la yaʼiybey skʼop te María, te alal te yikʼoje la stij sba yuʼun sbujtsʼ kʼinal. Noj ta chʼul espíritu te Elisabet sok jich la yalbey te María: Bayalme awutsil ta yolil te antsetike. Te María ayniwan oxeb u la sjokin te Elisabet, patil sujt bael ta Nazaret.

Nopol ya xnujpunix-a te María sok jtul winik te José sbiile. Jaʼukmeto te kʼalal la snaʼ stojol José te yikʼojix alal-a te Mariae, maba kʼan yikʼix yuʼun-a. Jaʼ yuʼun, jich albot yuʼun te chʼul abate: Mame xaxiʼ te ya awikʼ awinamin te Mariae, melel jaʼ ta swenta Dios te bitʼil ay yale. Jich yuʼun te José nujpun sok te Mariae, jich la smaliyik te bin ora ayin te Jesuse.