UFEKO u wa posoka ndeti Maria. Eye wa kala u Isareli vimbo lio Nasara. Suku wa kũlĩhĩle okuti eye omunu umue wa sunguluka. Eli olio esunga lieci a tumila ungelo waye Gabrieli oco a vangule laye. Ove hẽ wa kũlĩha eci Gabrieli eya oku vangula la Maria? Tu ci kũlĩhĩsi.

Ungelo wa popia hati: ‘Kalunga, okuesumũlũho. Yehova o kasi love.’ Maria ka la mola omunu waco. Kuenje wa yokokele, omo olondaka viaye ka vio lombolokele. Pole, ungelo wo tulisa utima.

Ungelo wa popia laye hati: ‘A Maria ku ka yokoke. Yehova wa ku sanjukila. Eye oka ku lingila ocina cimue ci komõhisa. Ove oka cita oñaña. Kuenje o yi tukula hati, Yesu.’

Ungelo Gabrieli wamisako hati: ‘Eye o linga unene, o tukuiwa Mõla a Suku Tõlo. Yehova u lingisa osoma, nda Daviti. Pole, Yesu oka kala osoma votembo ka yi pui, kuenda usoma waye ka u sulila.’

Maria wa pula hati: ‘Eci cika tẽlisiwa ndati,’ nda ame handi sia kuelele kuenda sia la kala lulume? Oco hẽ ndi cita ndati oñaña?’

Ungelo wa tambulula hati: ‘Unene wa Suku u ku wila. Kuenje omõlaco o tukuiwa hati Omõla a Suku.’ Noke ungelo wa sapuila Maria hati: ‘Ivaluka ngandiove Elisavete. Omanu va popaile okuti eye wa kuka calua oco a kuate omõla. Pole, eye ndopo o cita omõla. Ka kuli lacimue ka ci tẽliwa la Suku.’

Lonjanga yalua Maria wa popia hati: ‘Ndupika wa Yehova! Ndomo wa popia lame ci tẽlisiwe.’ Kuenje ungelo wa enda.

Maria wa enda lonjanga oku ka nyula Elisavete. Eci Elisavete a yeva ondaka ya Maria, oñaña ya kala vimo liaye ya yolela. Elisavete weyukisua Lespiritu Sandu kuenje wa popia la Maria hati: ‘Pokati kakãi ove wa sumũlũha.’ Maria wa kala la Elisavete ci soka olosãi vitatu, noke wa tiukila kimbo liaye ko Nasara.

Maria wa yonguiwile lulume umue o tukuiwa hati, Yosefe. Pole, eci Yosefe a limbuka okuti Maria oka cita omõla, ka yonguile vali oku u kuela. Ungelo wa Suku wo sapuila hati: ‘Ku ka kale lohele yoku kuela Maria. Momo Suku eye wo wiha omõla.’ Noke Yosefe la Maria va likuela, kuenje va kevelela oku citiwa kua Yesu.

Luka 1:26-56; Mateo 1:18-25.