NAKITA mo ba ang masanag nga bituon nga gitudlo sa usa ning mga lalaki? Kining mga tawhana maoy gikan sa Silangan. Sila nagtuo nga ang bituon nagtultol kanila ngadto sa usa ka tawo nga hinungdanon.

Sa miabot ang mga tawo sa Jerusalem, sila nangutana: ‘Hain man ang bata nga mahimong hari sa mga Hudiyo? Among nakita primero ang iyang bituon sa didto kami sa Silangan.’

Buweno, si Herodes, kinsa maoy hari sa Jerusalem, dili gustong may laing hari nga mopuli sa iyang dapit. Busa siya nangutana sa mga pangulong saserdote asa ang sinaad nga hari matawo. Sila mitubag: ‘Ang Bibliya nag-ingon nga sa Betlehem.’

Unya iyang gitawag ang mga tawo gikan sa Silangan. Iyang gisultihan sila nga pahibaloon siya kon ilang makaplagan diin ang bata. Si Herodes nagpakaaron-ingnon nga gusto siyang mosimba sa bata, apan sa pagkatinuod gusto siyang magpatay kaniya.

Ang mga tawo nagsunod sa bituon ngadto sa Betlehem, ug nakakaplag kon diin si Maria ug Jesus. Naghatag silag mga gasa sa gamayng bata. Apan si Jehova nagpasidaan sa mga tawo pinaagi sa usa ka damgo sa dili pagbalik kang Herodes. Busa sila namauli pinaagi sa laing alagianan.

Si Herodes nasuko sa dihang iyang nadunggan nga ang mga tawo gikan sa Silangan nakapamauli na. Busa siya mimando nga ang tanang batang lalaki sa Betlehem sa duha ka tuig ug ubos ang panuigon pagapatyon. Apan si Jehova nagpasidaan kang Jose, ug sila mikalagiw ngadto sa Ehipto. Human sa kamatayon ni Herodes, sila namalik sa Nasaret. Kini mao ang dapit diin si Jesus magtubo.

Kinsa man sa hunahuna mo ang naghimo nianang bag-ong bituon sa paghayag? Hinumdomi, tungod kay ang bituon mitultol sa mga tawo una sa Jerusalem, kini hapit makapahinabo sa pagpatay kang Jesus. Si Satanas nga Yawa nagtinguha sa pagpatay sa Anak sa Diyos, ug siya nasayod nga si Haring Herodes nagtinguha sa pagpatay kaniya. Busa si Satanas mao ang naghimo nianang bituong mahayag.