ANI oona ŋulami ni kpɛɔ waa ni hii nɛɛ ateŋ mɔ kome kɛ ewao tsɔɔ lɛ? Ŋulami lɛ je kpo beni amɛshi Yerusalem lɛ. Hii nɛɛ jɛ Bokagbɛ, ni amɛkwɛɔ ŋulamii amli. Amɛheɔ amɛyeɔ akɛ ŋulami hee nɛɛ miitsɔɔ amɛ gbɛ kɛmiiya mɔ ko ni he hiaa ŋɔɔ.

Beni hii lɛ yashɛ Yerusalem lɛ, amɛbi akɛ: ‘Nɛgbɛ gbekɛ ni baafee Yudafoi lɛ amaŋtsɛ lɛ yɔɔ?’ Gbɛi kroko ni akɛtsɛɔ Israelbii lɛ ji “Yudafoi.” Hii lɛ kɛɛ akɛ: ‘Wɔna gbekɛ lɛ ŋulami lɛ klɛŋklɛŋ kwraa beni wɔyɔɔ Boka lɛ, ni wɔba koni wɔbaja lɛ.’

Beni Herode, ni yeɔ maŋtsɛ yɛ Yerusalem lɛ nu enɛ he lɛ, egbá enaa waa. Esumɔɔɔ ni maŋtsɛ kroko abahe egbɛhe lɛ kɛjɛ edɛŋ. No hewɔ lɛ Herode tsɛ osɔfonukpai lɛ ni ebi amɛ akɛ: ‘Nɛgbɛ abaafɔ maŋtsɛ ni awo shi yɛ ehe lɛ yɛ?’ Amɛha hetoo akɛ: ‘Biblia lɛ kɛɛ, abaafɔ lɛ yɛ Betlehem.’

No hewɔ lɛ Herode tsɛ hii ni jɛ Boka lɛ ni ekɛɛ amɛ akɛ: ‘Nyɛyaa ni nyɛyataoa abifao lɛ. Kɛ nyɛna lɛ lɛ, nyɛhaa malea. Miitao ni mi hu mayaja lɛ.’ Shi, yɛ anɔkwale mli lɛ, Herode miitao ni ena abifao lɛ ni egbe lɛ!

Kɛkɛ ni ŋulami lɛ nyiɛ hii lɛ ahiɛ kɛtee Betlehem, ni eyawa yɛ he ni afɔ abifao lɛ yɛ lɛ. Beni hii lɛ bote shia lɛ mli lɛ, amɛna Maria kɛ abifao Yesu. Amɛjie nikeenii ni amɛkɛha Yesu. Shi sɛɛ mli lɛ Yehowa bɔ hii lɛ kɔkɔ yɛ lamɔ mli akɛ, amɛkaya Herode ŋɔɔ. No hewɔ lɛ amɛku amɛsɛɛ kɛtee amɛmaŋ kɛtsɔ gbɛ kroko nɔ.

Beni Herode nu akɛ hii ni jɛ Boka lɛ eku amɛsɛɛ kɛtee amɛmaŋ lɛ, emli fu waa diɛŋtsɛ. No hewɔ lɛ ewo mla akɛ agbe gbekɛbii hii ni yɔɔ Betlehem ni yeko afii enyɔ lɛ fɛɛ. Shi Yehowa bɔ Yosef kɔkɔ mra kɛtsɔ lamɔ nɔ, ni Yosef kɛ eweku lɛ fɛɛ shi kɛtee Mizraim. Yɛ sɛɛ mli, beni Yosef nu akɛ Herode egbo lɛ, ekɛ Maria kɛ Yesu ku amɛsɛɛ kɛba Nazaret. Biɛ ji he ni Yesu da yɛ.

Namɔ osusuɔ akɛ lɛ eha ŋulami hee lɛ kpɛ lɛ? Kaimɔ akɛ, hii lɛ tee Yerusalem klɛŋklɛŋ beni amɛna ŋulami lɛ. Satan Abonsam miitao ni egbe Nyɔŋmɔ Bi lɛ, ni ele akɛ Maŋtsɛ Herode ni yɔɔ Yerusalem lɛ baabɔ mɔdɛŋ koni egbe lɛ. No hewɔ lɛ eeenyɛ efee akɛ Satan ji mɔ ni ha nakai ŋulami lɛ kpɛ lɛ.