INAI tau ia poinia noho hisiu oi itaia diba, a? Ierusalema idia rakatania neganai, inai hisiu ia hedinarai. Inai tatau be Ist kahana amo, bona idia be hisiu stadilaia taudia. Idia abia dae inai hisiu matamatana ese tau badana ta dekenai idia do ia hakaua lao.

Inai tatau be Ierusalema dekenai idia ginidae neganai, idia henanadai: ‘Iuda taudia edia king ai do ia lao merona be edeseni?’ ‘Iuda’ be Israela taudia edia ladana ma ta. Unai tatau idia gwau: ‘Ist kahana dekenai ai noho neganai, ena hisiu ai itaia, bona ai mai ia ai tomadiho henia totona.’

Ierusalema ena king Heroda, ese unai ia kamonai neganai ia badu. Ia ura lasi king ma ta ese ena gabu ia abia. Unai dainai Heroda ese hahelaga taudia badadia ia boiria bona ia nanadaidia: ‘Gwauhamata king be edeseni do ia vara?’ Idia haere: ‘Buka Helaga ia gwau Betelehema dekenai.’

Unai dainai Heroda ese Ist kahana amo idia mai taudia ia boiridia, bona ia gwau: ‘Umui lao, mero maragina umui tahua. Umui davaria neganai, lau umui hadibaia. Lau danu lau ura ia lau tomadiho henia.’ To momokani, Heroda ia ura natuna ia tahua bena do ia hamasea!

Bena hisiu be unai tatau edia vairana dekenai ia lao ela bona Betelehema dekenai, mero ia noho gabuna ataiai. Unai tatau be ruma lalonai idia vareai neganai, Maria bona Iesu idia davaria. Harihari gaudia idia abia bona Iesu dekenai idia henia. To gabeai, nihi amo Iehova ese unai tatau ia hadibaia Heroda dekenai do idia giroa lou lasi. Unai dainai, dala idauna amo edia hanua dekenai idia giroa.

Heroda ia kamonai Ist kahana amo idia mai tatau be edia hanua dekenai idia giroa lou vadaeni neganai, ia badu dikadika. Unai dainai ia haganidia lagani rua bona henunai memero ibounai do idia alaia mase. To nihi amo Iehova ese Iosepa ia hadibaia guna, bona Iosepa be ena ruma bese ida Aigupito dekenai idia heau lao. Gabeai, Iosepa ese Heroda ena mase sivaraina ia dibaia neganai, Maria bona Iesu be Nasareta dekenai ia abidia giroa. Iesu be unuseniai ia tubu daekau.

Oi laloa daika ese unai hisiu matamatana ia siaia? Laloaboio lasi, unai tatau ese hisiu idia itaia murinai, Ierusalema dekenai idia lao guna. Satani Diabolo ia ura Dirava ena Natuna ia hamasea, bona ia diba Ierusalema ena King Heroda, ese do ia hamasea toho. Unai dainai ita diba Satani ese unai hisiu ia siaia.