Ovarumendu mba ṱikwa i onyose
EHUNGI 86
Ovarumendu mba ṱikwa i onyose
ONYOSE ondjere ndji mai urikwa i umwe wovarumendu mba ove mo i munu? Owo tji va za mu Jerusalem, onyose otji ya uta okumunika. Ovarumendu mba va za komuhuka nowo ovakonḓonone vozonyose. Owo ve nongamburiro kutja onyose ombe ndji, mai ve twara komundu omunanḓengu.
Ovarumendu mba tji va vaza mu Jerusalem, va pura nave tja: ‘Okanatje ku ka kwaterwa okurira ombara yOvajuda ke ri pi?’ “Ovajuda” ena rOvaisrael rarwe. Ovarumendu va tja: ‘Eṱe rutenga twa munu onyose yako amai piti komuhuka, nu twe ya okuyekurikotamena ku ko.’
Indu Herodes, ngwa ri ombara yaJerusalem, tja zuva ohunga na ihi wa pindika. Eye kaa vanga kutja ombara yarwe i kambure oruveze rwe. Okutja Herodes wa isana ovapristeri oviuru ne ve pura a tja: ‘Ombara ndja
kwizikwa mai kwaterwa pi?’ Owo ve mu zira na ve tja: ‘Ombeibela mai tja ma kwaterwa mu Betlehem.’
Okutja Herodes wa isana ovarumendu vokomuhuka na tja ku wo: ‘Twendeye mu kapahe okanatje, nu tji mwe kekemuna mu yekundjitjivisa. Ami wina me vanga okukerikotamena ku ko.’ Nungwari, tjiri, Herodes aa vanga okumuna okanatje kutja me ke zepe!
Okuzambo onyose ye ve hongorera nga ku Betlehem, nai kakurama kombanda yopoṋa mba pu pa ri okanatje. Indu ovarumendu tji va hita mondjuwo, owo va vaza Maria nokanatje Jesus. Owo va nana oviyandjewa nave vi yandja ku Jesus. Nungwari kombunda Jehova wa rakiza ovarumendu mba moruroto kutja ave ha yaruka ku Herodus. Okutja owo va twara ondjira yarwe okuyaruka kehi rawo.
Indu Herodes tja zuva kutja ovarumendu vokomuhuka va yaruka ko yawo, eye wa handjere tjinene. Okutja eye wa yandja erakiza rokutja ouzandu auhe mu Betlehem wozombura mbari nokehi ve zepwe. Nungwari Jehova wa rakiza Josef komurungoruveze moruroto, nu Josef neṱunḓu re va ya ku Engipte. Kombunda indu Josef tja zuva kutja Herodes wa ṱa, eye wa toora Maria na Jesus nave yaruka konganda ku Nasaret. Jesus we kekurira ngo.
Ouṋe, ove tji mo ripura, ngwa tjita kutja onyose ombe ndjo i yere? Zemburuka kutja ovarumendu rutenga va ya ku Jerusalem indu tji va za nokumuna onyose. Satan Omudiaboli aa vanga okuzepa Omuna waMukuru, neye aa tjiwa kutja Ombara Herodes mape ya a kondjisa okumuzepa. Okutja Satan ongwa tjita kutja onyose ndjo i yere.
