Irgazen yeţţuwellhen s yetri
TAQSIṬ TIS 86
Irgazen yeţţuwellhen s yetri
TWALAḌ itri-yinna yeţfeǧǧiǧen uɣur iţwehhi wergaz-a? Irgazen-agi i teţwaliḍ d imkucaf yessenṭaqen itran. Ṛuḥen-d si Ccerq axaṭer nwan a ten-yawi yetri-yagi ajdid ɣer walbeɛḍ mechuṛen.
Asmi i wwḍen ɣer temdint n Yarucalim (iwumi qqaren kra Lquds) steqsan: ‘Anda yella weqcic-nni ara yuɣalen d agellid n Wudayen?’ “Udayen” d isem wis sin n wat Isṛayil. Nnan daɣen: ‘Axaṭer nwala-d itri-ines si Ccerq, nusa-d a t-neɛbed.’
Hiṛudus yellan d agellid n temdint n Yarucalim yerwi lxaṭer-is mi gesla i lexbaṛ-agi. Ur yebɣi ara ad yeṭṭef ugellid nniḍen amkan-is. Hiṛudus yesnejmaɛ-ed ihi imeqranen n lmuqeddmin, isteqsa-ten: ‘Anda ara d-ilal ugellid-nni i d-yewɛed Ṛebbi?’ Rran-as: ‘Di temdint n Bit-Liḥim.’
Hiṛudus yessawel i yergazen-nni i d-yusan si Ccerq, yenna-yasen: ‘Ṛuḥet, nadit ɣef weqcic-nni. M’ara t-tafem, xebbṛet-iyi-d iwakken ad ṛuḥeɣ a t-ɛebdeɣ ula d nekk.’ Lameɛna, di tin n ṣṣeḥ, Hiṛudus d lmut-is i gebɣa.
Ihi irgazen-nni ṭṭfen abrid ṛuḥen. Tebɛen itri-nni i ten-yewwin armi d Bit-Liḥim, ɣer wexxam anda yella weqcic-nni. Mi kecmen ɣer daxel, ufan dinna Meryem d Ɛisa. Dɣa mudden i Ɛisa tikciwin i s-d-wwin. Iɛedda kra n lweqt, Yahwa yenna-yasen di targit: ‘Ur ţţuɣalet ara ɣer ugellid Hiṛudus.’ Dɣa uɣalen ɣer tmurt-nsen seg webrid nniḍen.
Asmi i gesla Hiṛudus belli irgazen-nni i d-yusan si Ccerq ṛuḥen, ikcem-it zzɛaf d ameqran. Dɣa yumeṛ ad nɣen arrac meṛṛa yesɛan sin iseggasen d akessar yellan di temdint n Bit-Liḥim. Lameɛna Yahwa yessaweḍ lexbaṛ i Yusef di targit. Dɣa Yusef yerwel neţţa ţ-ţwacult-is ɣer tmurt n Maṣer. Mi gɛedda kra n lweqt, Yusef ţ-ţwacult-is uɣalen ɣer wexxam-nsen yellan di Naṣaret axaṭer slan belli yemmut Hiṛudus. Dinna i d-ikker Ɛisa.
Teẓriḍ anwa i gewwin itri-nni ad icceɛceɛ? A nxemmem ciṭuḥ. Tecfiḍ ɣef yergazen-nni i d-yusan si Ccerq? Ɣer temdint n Yarucalim i ṛuḥen di tazwara asmi i walan itri-nni. Cciṭan Iblis ibɣa lmut n Mmi-s n Ṛebbi yerna yeẓra belli Hiṛudus, agellid n Yarucalim, ad iqelleb ad ineɣ Ɛisa. D Cciṭan ihi i gellan deffir uceɛceɛ n yetri-nni.
