WE NĨWENE ndata ĩĩya ĩkenete ũmwe wa aũme aa wolootete? Andũ aa maumĩte wumĩlonĩ wa syũa, na me na ũmanyi wa ndata. Mena mũĩkĩĩo kana ndata ĩsu nzaũ ĩmatongoesye ĩmatwae kwa mũndũ wa vata mũno.

Andũ asu mavika Yelusaleme, makũlilye ũũ: ‘Aĩva mwana ũla wĩtw’ĩka mũsumbĩ wa Ayuti?’ “Ayuti” nĩ syĩtwa yĩngĩ ya Aisilaeli. Na aũme asu masya: ‘Nĩtwoonie ndata yake ĩvinda ya mbee twĩ wumĩlonĩ wa syũa, na nĩtwooka kũmũthaitha.’

Yĩla Elote mũsumbĩ wa Yelusaleme weewie ũndũ ũsu aũũya. Ndendaa mũsumbĩ ũngĩ ayosa kĩvĩla kyake kya ũsumbĩ. Kwoou Elote eeta athembi anene na amakũlya: ‘Mũsumbĩ ũla wathanĩtwe akasyaĩwa va?’ Namo mamũsũngĩa: ‘Mbivilia yaasya nĩ Mbetheleemu.’

Kwoou Elote eeta aũme asu maumĩte wumĩlonĩ wa syũa, na amea: ‘Endai mũkamanthe kana kau. Na mwakona, ndeteei ũvoo. Nĩngwenda kũthi o nakwa ngakathaithe.’ Ĩndĩ, kwa w’o, Elote endaa one a kana akoae!

Na mauma Yelusaleme ĩla ndata yaumĩla na yamatongoesya aũme asu mũvaka Mbetheleemu, nayo yalũma vala kana kau kaĩ. Na malika nyũmba nthĩnĩ, moona Meli na kana Yesũ. Na maumya mĩthĩnzĩo na mamũnenga Yesũ. Ĩndĩ ĩtina Yeova akany’a aũme asu ndotonĩ maikasyokele kwa Elote. Kwoou masyoka nthĩ yoo na nzĩa ĩngĩ.

Yĩla Elote wamanyie kana aũme asu ma kuma wumĩlonĩ wa syũa nĩmanenũkie, athata mũno. Kwoou eeĩaa tũvĩsĩ tw’onthe tũla twĩ Mbetheleemu tũvikĩtye myaka ĩlĩ na nthĩ wa vau nĩtũawe. Ĩndĩ Yeova amũmanyĩthya Yosevu mbee ndotonĩ, nake Yosevu athi na mũsyĩ wake Misili. Ĩtina, yĩla Yosevu wamanyie kana Elote nĩ mũkw’ũ, oosa Meli na Yesũ masyoka mũsyĩ kwoo Nasaleti. Kũu nĩkw’o Yesũ weanĩie.

We wĩsũanĩa taũ watumie ndata ĩsu nzaũ ĩkena? Lilikana, aũme asu mbee mambie kũthi Yelusaleme ĩtina wa kwona ndata ĩsu. Satani ũla nĩwe Ndevili endaa kũaa mwana wa Ngai, na nĩweesĩ kana Mũsumbĩ Elote wa Yelusaleme nũkũtata kũaa Yesũ. Kwoou no nginya wĩthĩe Satani nĩwe watumie ndata ĩsu ĩkena.

Mathayo 2:1-23; Mika 5:2.