MA NAKAANAW kʼaʼut yookebʼ rilbʼal li chahim? Aj ilol chahim ebʼ li winq aʼin ut nekeʼchalk saʼ relebʼl Saqʼe. Keʼxkʼoxla naq li chahim aʼin, yook xkʼeebʼal rehebʼ jun li chaabʼil esil.

Naq ebʼ li winq keʼwulak saʼ li tenamit Jerusalen, keʼxye: ‹Bʼar wank li kʼuulaʼal li tkanaaq choʼq awabʼej saʼ xbʼeenebʼ laj Judio? Xqil chaq li xchahimal saʼ li relebʼl Saqʼe, joʼkan naq xoochalk chi xloqʼoninkil ru›. Ebʼ laj Israel keʼkʼabʼaʼiik ajwiʼ choʼq aj Judio.

Laj Herodes, li awabʼej re Jerusalen, kiʼok xkʼaʼuxl naq kirabʼi xyoʼlajik li kʼuulaʼal aʼin. Inkʼaʼ kiraj naq jalan chik li awabʼej tkanaaq saʼ xnaʼaj. Joʼkan naq, kixye rehebʼ li xbʼeenil aj tij: ‹Bʼar tyoʼlaaq li kʼuulaʼal, li tkanaaq choʼq awabʼej?› Ebʼ laj tij keʼxye re: ‹Li Santil Hu naxye naq saʼ li tenamit Belen›.

Laj Herodes kixye rehebʼ li winq, li keʼchalk saʼ relebʼl Saqʼe: ‹Sikʼamaq li kʼuulaʼal ut naq teetaw, teeye we re naq tinloqʼoni chaq ru›. Ma yaal tawiʼ li kixye laj Herodes? Laj Herodes traj xtawbʼal li kʼuulaʼal re xkamsinkil.

Naq ebʼ li winq keʼelk chaq Jerusalen, li chahim kixkʼe chaq ribʼ saʼ xbʼeen li tenamit Belen, bʼarwiʼ kiyoʼlaak li Jesus. Ut naq ebʼ li winq keʼok saʼ ochoch keʼxkʼe xmaatan li xkʼuulaʼal li xMaria. Chirix chik aʼan, li Jehobʼa kixye rehebʼ li winq, saʼ jun li matkʼ naq inkʼaʼ teʼsutqʼiiq rikʼin laj Herodes. Joʼkan naq keʼxjal xbʼe naq kohebʼ saʼ li xtenamitebʼ.

Kʼajoʼ naq kichalk xjosqʼil laj Herodes naq ebʼ li winq aʼin inkʼaʼ chik keʼsutqʼiik rikʼin. Joʼkan naq kixtaqla xkamsinkilebʼ li kokʼ chʼinaʼal ebʼ laj Belen, li wankebʼ wiibʼ chihabʼ re ut li toj maajiʼ nekeʼtzʼaqlok wiibʼ chihabʼ. Li Jehobʼa kiraatina laj Jose saʼ jun li matkʼ, re naq tixkʼam li xjunkabʼal saʼ li tenamit Egipto. Naq laj Jose kixnaw naq kikamk laj Herodes, kixkʼam chaq li xMaria ut li Jesus saʼ li tenamit Nazaret. Joʼkan naq aran kikʼiik li Jesus.

Ani kikʼutbʼesink re li chahim chiruhebʼ li winq? Chaajultika naq ebʼ li winq, kohebʼ saʼ li tenamit Jerusalen naq keʼril li chahim. Xbʼaan naq laj Tza kiraj xkamsinkil li Ralal li Yos ut naxnaw naq laj Herodes tixsikʼ chanru tixkamsi li Jesus. Laj Tza kixbʼaanu naq ebʼ li winq teʼril li chahim.