WAHOTA kuona njata ĩĩrĩa ngengu mũno yorotetwo nĩ ũmwe wa andũ aya? Rĩrĩa moimire Jerusalemu-rĩ, njata ĩo nĩyoimĩrire. Andũ aya moimĩte Irathĩro, na nĩ ogĩ a njata. Metĩkĩtie atĩ njata ĩno njerũ ĩkũmatongoria ĩmakinyie he mũndũ wĩ igweta.

Rĩrĩa andũ acio maakinyire Jerusalemu-rĩ, moririe atĩrĩ: ‘Ũrĩa ũciarĩtwo arĩ mũthamaki wa Ayahudi, arĩ ha?’ “Ayahudi” nĩ rĩĩtwa rĩngĩ rĩa Aisiraeli. Andũ acio moigire atĩ, ‘Nĩtwonire njata yake kũrĩa Irathĩro, na nĩtũũkĩte tũmũturĩrie ndu tũmũgooce.’

Na rĩrĩa Herode, ũcio mũthamaki warĩ Jerusalemu, aaiguire ũhoro ũcio akĩigua ũiru. We ndendaga mũndũ ũngĩ atuĩke mũthamaki. Nĩ ũndũ ũcio Herode agĩĩta athĩnjĩri-Ngai arĩa anene akĩmoria atĩrĩ: ‘Mũthamaki ũrĩa weranĩirũo agaciarĩrũo kũ?’ Maamũcokeirie atĩrĩ: ‘Biblia yuugaga nĩ thĩinĩ wa Bethilehemu.’

Kwoguo Herode agĩĩta andũ acio a kuuma Irathĩro, na akĩmera: ‘Thiĩi, mũgatuĩrie wega ũhoro wa gakenge kau. Na mwakona, cokai mũhe ũhoro. Nĩ getha o na niĩ ngagaturĩrie ndu ndĩkagooce.’ No, kũna kũna, Herode eendaga kũũraga gakenge kau!

Nayo njata ĩo ĩkĩmathiĩ mbere nginya Bethilehemu, na ĩkĩrũgama igũrũ rĩa harĩa gakenge kau kaarĩ. Rĩrĩa andũ acio maatonyire nyũmba-rĩ, makĩona Mariamu ena Jesu. Makĩohora iheo ciao makĩhe Jesu. Thutha ũcio na njĩra ya kĩroto Jehova akĩmakania matigacoke kwĩ Herode. Nĩ ũndũ ũcio maagereire njĩra ĩngĩ magĩcoka bũrũri wa kwao.

Rĩrĩa Herode aamenyire atĩ andũ acio a kuuma Irathĩro nĩ maacokire kwao-rĩ, agĩkĩrakara mũno. Rĩu agĩathana atĩ tũhĩĩ tuothe twa kũu Bethilehemu twa mĩaka ĩĩrĩ gũcoka na thĩ tũũragwo. Na rĩu Jehova akĩmenyithia Jusufu o mbere na njĩra ya kĩroto, nake Jusufu akĩũrĩra Misiri ena famĩlĩ yake. Thutha-inĩ, rĩrĩa Jusufu aiguire atĩ Herode nĩarĩkĩtie gũkua, akĩinũkia Mariamu na Jesu kwao mũciĩ Nazarethi. Gũkũ nĩkuo Jesu aakũrĩire.

Wee-rĩ, ũgwĩciria nũũ watũmire njata ĩo ĩkenge mũno? Ta ririkana, andũ acio mbere maambire gũthiĩ Jerusalemu mona njata ĩo. Shaitani Mũcukani eendaga kũũraga Mũrũ wa Ngai, na nĩ oĩ atĩ Mũthamaki Herode wa Jerusalemu nĩekũgeria kũmũraga. Nĩ ũndũ ũcio-rĩ, Shaitani nĩwe watũmĩte njata ĩo ĩkenge mũno.