NANCHI wikamona kabangabanga kakema mwanamulume umo ko abena kutongola na munwe nyi? Byo bafumine mu Yelusalema, kabangabanga kamwekele ko baji. Bano banabalume bafumine ku Musela, kabiji bajinga bamfunji batubangabanga. Baitabijile’mba kano kabangabanga kakatataka, kebatwajilenga ku muntu umo wanema.

Banabalume byo bafikile mu Yelusalema, baipwizhe’mba: ‘Mwana wasemwa ukekala mfumu wa Bayudea uji pi?’ “Bayudea” ke jizhina jikwabo ja bena Isalela. Banabalume baambile’mba: ‘Twikamwene kabangabanga ka mwana kimye kyo twajinga ku Musela kabiji twaiya na kumupopwela.’

Mfumu wajinga mu Yelusalema, aye Heloda byo aumvwine bino, wazhingijile. Kechi wakebelenga mfumu mukwabo kwikala pa kifulo kyanji ne. Onkao mambo, Heloda waichile bañanga bakatampe ne kwibepuzha’mba: ‘Kwepi kukasemwa mfumu walayiwe.’ Bakumbwile’mba: ‘Baibolo waamba’mba mu Betelema.’

Kepo Heloda aichile banabalume ba ku Musela ne kwamba’mba: ‘Yainga mukakebe kuji uno mwana. Umvwe mwamutana, mukambule. Mbena kukeba ne amiwa nkaye na kumupopwela.’ Pano bino Heloda wakebelenga kumutana mwana ne kumwipaya!

Ponkapo, kabangabanga kebatangijilenga banabalume ku Betelema kabiji pa kufika pa mpunzha pajinga mwana kaimene peulu. Banabalume byo batwelele mu nzubo, bataine Maliya ne mwananji, aye Yesu. Baletele bya bupe ne kwibipana kwi Yesu. Bino Yehoba wibajimwineko banabalume mu kiloto amba kechi bafwainwe kubwela kwi Heloda ne. Onkao mambo, babwelele kwabo mu jishinda jingi.

Heloda byo aumvwine’mba banabalume ba ku Musela babwela kwabo, wazhingijile bingi. Onkao mambo, wapaine mukambizho wa kuba’mba, baana babalume bonse bajinga na myaka ya kusemwa ibiji ne kubwela panshi bajinga mu Betelema bepaiwe. Bino Yehoba wamujimwijile jimo Yosefwa mu kiloto kabiji ponkapo Yosefwa ne kisemi kyanji banyemejile ku Ijipita. Mu kuya kwa kimye Yosefwa byo aumvwine’mba Heloda wafwa, wasendele Maliya ne Yesu kubwela ku muzhi wa Nazala. Kuno Yesu ko ko akomejile.

Walanguluka’mba ñanyi walengejile koka kabangabanga kukema? Vuluka’mba, banabalume patanshi bayile ku Yelusalema panyuma ya kumona kabangabanga. Satana Diabola wakebelenga kwipaya Mwana Lesa, kabiji wayukile’mba Mfumu Heloda wa mu Yelusalema ukakeba kumwipaya. Onkao mambo, Satana wafwainwa ye walengejile koka kabangabanga kukema.