ပူ ၈၆
ပှၤတဖၣ်လၢ ဆၣ်တဖျၢၣ်နဲၣ်အီၤကျဲ အဂ့ၢ်
လၢပှၤ တဖၣ်အံၤအကျါ ပှၤတဂၤယူာ်ဃီၤအစုဆူ ဆၣ်ကပြုၢ်ဖးဒိၣ်တဖျၢၣ်န့ၣ် သုထံၣ်ဧါ. ပှၤတဖၣ် ဟးထီၣ်လၢယရူၤၡလ့ၣ်အခါ ဆၣ်အံၤဖျါထီၣ်ဝဲဒၣ်န့ၣ်လီၤ. ပှၤတဖၣ်အံၤ အိၣ်ဟဲလၢ ကီၢ်မုၢ်ထီၣ်တခီလီၤ. အဝဲသ့ၣ်မ့ၢ် ပှၤမၤလိဃုသ့ၣ်ညါ ဆၣ်ဧိၤဖီဧိၤအဂ့ၢ်တဖၣ်လီၤ. အဝဲသ့ၣ်နာ်ဝဲလၢ ဆၣ်လၢဟဲပၢၢ်ထီၣ်အသီတဖျၢၣ်အံၤ အတၢ်နဲၣ်အဝဲသ့ၣ်ကျဲဆူ ပှၤလၢအကါဒိၣ်ဝဲဒိၣ်မးတဂၤအအိၣ်န့ၣ်လီၤ.
ဖဲအဝဲသ့ၣ်တုၤဆူယရူၤၡလ့ၣ်အခါ သံကွၢ်ဝဲသ့ၣ် ‘ဖိသၣ်လၢကကဲ ပှၤယူဒၤဖိအစီၤပၤန့ၣ် အိၣ်ဖဲလဲၣ်’ န့ၣ်လီၤ. “ယူဒၤ” န့ၣ်မ့ၢ် ပှၤအံၣ်စရ့လးဖိအမံၤလၢခံတခါန့ၣ်လီၤ. ပှၤတဖၣ်စံးဝဲ ‘ပအိၣ်လၢကီၢ်မုၣ်ထီၣ်အခါ ပထံၣ်ဘၣ်ပဝဲ ဖိသၣ်အံၤအဆၣ် လၢအဆိကတၢၢ်ဒီး ပဟဲလၢ ပကဘူၣ်ထီၣ်ဘါထီၣ်အီၤန့ၣ်လီၤ.’
ဟ့ၤရိာ်လၢအကဲစီၤပၤ လၢယရူၤၡလ့ၣ်တခီ တုၤအနၢ်ဟူဝဲဒီး အသးကိၢ်ထီၣ်ဝဲန့ၣ်လီၤ. အဝဲတအဲၣ်ဒိးလၢ စီၤပၤအဂၤတဂၤ ကဂုာ်န့ၢ်အလီၢ်ဘၣ်. လၢတၢ်န့ၣ်အဃိ ဟ့ၤရိာ်ကိး ပှၤလုၢ်တၢ်အဒိၣ်တဖၣ်ဒီး သံကွၢ်ဝဲ ‘စီၤပၤလၢ ဘၣ်တၢ်စံးပာ်ဃာ်အီၤန့ၣ် ကအိၣ်ဖျဲၣ်ထီၣ်ဖဲလဲၣ်.’ န့ၣ်လီၤ. ပှၤလုၢ်တၢ်အဒိၣ်တဖၣ် စံးဆၢက့ၤအီၤလၢ ‘လံာ်စီဆှံကွဲးအိၣ်အသးဝဲဒၣ် လၢဝ့ၢ်ဘ့ၤသလ့ဃ့ၢ်န့ၣ်လီၤ.’
ဒ်န့ၣ်ဒီး ဟ့ၤရိာ်ကိး ပှၤအဟဲလၢမုၢ်ထီၣ်တဖၣ် ဒီးစံးဝဲဒၣ်, ‘လဲၤဃုဖိသၣ်အံၤဒီး သုမ့ၢ်ထံၣ်အီၤန့ၣ် ဟဲက့ၤတဲဘၣ်ယၤတက့ၢ်. ယဲစ့ၢ်ကီး ယအဲၣ်ဒိးလဲၤဘူၣ်ထီၣ်ဘါထီၣ်အီၤန့ၣ်လီၤ.’ နီၢ်နီၢ်တခီ ဟ့ၤရိာ်န့ၣ် အဲၣ်ဒိးမၤသံကွံာ်ဖိသၣ်အဃိလီၤ.
မၤအသးဒ်န့ၣ်ဒီး ဆၣ်ဖးဒိၣ်န့ၣ် လဲၤတၢ်လၢအဝဲသ့ၣ်အမဲာ်ညါဒီး နဲၣ်ကျဲဆူဝ့ၢ်ဘ့ၤသလ့ဃ့ၣ်န့ၣ်လီၤ. ဖဲအလဲၤတုၤလၢ ဖိသၣ်အိၣ်အလီၢ်န့ၣ် အိၣ်ကတီၢ်ဝဲလီၤ. ပှၤတဖၣ်နုာ်လီၤဆူဟံၣ်ပူၤဒီး ထံၣ်ဘၣ်ဝဲသ့ၣ် မၤရံဒီးဖိသၣ်ယ့ၣ်ၡူးန့ၣ်လီၤ. ထုးထီၣ်ဝဲသ့ၣ် ခိၣ်ဖးတဖၣ်ဝံၤ ဟ့ၣ်တ့ၢ်ဝဲသ့ၣ်ယ့ၣ်ၡူးန့ၣ်လီၤ. ဘၣ်ဆၣ်သနာ်က့ လၢခံန့ၣ် ဒ်သိးအသုတက့ၤဆူဟ့ၤရိာ်အအိၣ်တဂ့ၤအဂီၢ် ယဟိဝၤဟ့ၣ်ပလီၢ်အဝဲသ့ၣ်လၢ တၢ်မံမီၢ်အပူၤလီၤ. လၢတၢ်န့ၣ်အဃိ အဝဲသ့ၣ်က့ၤကဒါဆူအကီၢ် လၢကျဲအဂၤတဘိန့ၣ်လီၤ.
ဖဲဟ့ၤရိာ်နၢ်ဟူ ပှၤလၢအဟဲလၢကီၢ်မုၢ်ထီၣ်တဖၣ် က့ၤကဒါက့ၤဆူအဟံၣ်ဒီး ဟ့ၤရိာ်အသးထီၣ်ဒိၣ်မးန့ၣ်လီၤ. တၢ်န့ၣ်အဃိ ခါလီၤအကလုၢ်လၢ ပှၤကမၤသံကွံာ် ဖိသၣ်ခံနံၣ်ဒီးခံနံၣ်အဖီလာ်ခဲလၢာ် လၢအအိၣ်လၢဝ့ၢ်ဘ့ၤသလ့ဃ့ၣ်န့ၣ်လီၤ. ဘၣ်ဆၣ် ယဟိဝၤယွၤန့ၣ် ဟ့ၣ်ပလီၢ်ဆိယိၤသးလၢ တၢ်မံမီၢ်ပူၤန့ၣ်လီၤ. ထဲန့ၣ်ဒီး, ယိၤသးဒီးအပှၤဟံၣ်ဖိတဖၣ် ဟးထီၣ်ဝဲသ့ၣ်ဆူ ကီၢ်အဲၤကူပတူးန့ၣ်လီၤ. လၢခံ ဖဲယိၤသးနၢ်ဟူ ဟ့ၤရိာ်သံဝံၤအလီၢ်ခံန့ၣ် က့ၤကိးဝဲမၤရံဒီးယ့ၣ်ၡူးဆူအဟံၣ် လၢအအိၣ်လၢဝ့ၢ်နစၤရ့းန့ၣ်လီၤ. ယ့ၣ်ၡူးဒိၣ်ထီၣ်ဖဲန့ၣ်လီၤ.
မတၤမၤကပြုၢ်ကပြီၤ ဆၣ်အသီအံၤလဲၣ်န့ၣ် သုသ့ၣ်ညါဧါ. သ့ၣ်နီၢ်လၢ ပှၤတဖၣ်န့ၣ် ထံၣ်ဝဲသ့ၣ်ဆၣ်ဖးဒိၣ်ဝံၤအလီၢ်ခံ လဲၤဝဲသ့ၣ်ဆူယရူၤၡလ့ၣ်လၢညါလီၤန့ၣ်တက့ၢ်. မုၣ်ကီၤလံၢ်န့ၣ် အဲၣ်ဒိးမၤသံဝဲ ယွၤအဖိခွါလီၤ. အဝဲသ့ၣ်ညါလၢ ဟ့ၤရိာ်လၢအအိၣ်လၢ ယရူၤၡလ့ၣ်န့ၣ် ကဂုာ်ကျဲးစၢးမၤသံဖိသၣ်န့ၣ်လီၤ. လၢတၢ်န့ၣ်အဃိ ပှၤလၢအမၤကပြုၢ်ကပြီၤထီၣ်ဆၣ်ဖးဒိၣ်န့ၣ် ကဘၣ်မ့ၢ်ဒၣ်မုၣ်ကီၤလံၢ်န့ၣ်လီၤ.
