Chihande 86

Malunga Navavatwaminyina Kuli Tanganyika

WAMUMONO tanganyika namunyika zwalala vanenyika kuli umwe wavava malunga nyi? Hakukatuka chavo kuYelusalema, tanganyika himwasoloka. Ava malunga vanafumu kuMusamuko, kaha veji kulinangula vyavatanganyika. Vanafwelela ngwavo ou tanganyika wamuhya anakuvatwala kumutu wamulemu.

Ava malunga hakuheta kuYelusalema, vahulishile ngwavo: ‘Nyi mwana mwakapwa mwangana wavaYuleya ali kulihi?’ “VaYuleya” vakivo vaIsalele. Malunga vano ngwavo: ‘Twavangilanga kumona tanganyika yayou mwana omu twapwanga kuMusamuko, kaha tuneza mangana tumulemese.’

Omu evwileko Helote, mwangana waYelusalema, apihililile. Kasakile kumuswana kumwangana wekako. Kaha Helote asanyikile vapilishitu vavalemu nakuvehula ngwenyi: ‘Nyi mwangana walushiko mwakasemukila kulihi?’ Vakivo ngwavo: ‘Mbimbiliya yamba ngwayo muMbetelema.’

Kaha Helote asanyikile malunga vafumine kuMusamuko ngwenyi: ‘Yenu nakutondatonda uze mwana. Nge munamuwane, mwize mungulweze. Nayami ngunasake nguyenga nakumulemesa.’ Oloze, chikupu, Helote asakile awane mwana nakumujiha!

Jino tanganyika himwatetekela malunga vano kulutwe swi nakuMbetelema, nakwimana hachihela ali mwana. Ava malunga hakwingila muzuvo, hinavawana Maliya nakanyike Yesu. Hikulovola mawana nakuhana Yesu. Oloze kufumaho, Yehova himwahuhumuna malunga ava muchilota nge kanda vakindulukila cheka kuli Heloteko. Ngocho vayile kulifuchi lyavo mujila yeka.

Helote hakwivwa nge vaze malunga vakuMusamuko vanakinduluka lyehi kwimbo, himwapihilila. Ngocho hikuhana lushimbi lwakujiha vana vamalunga vamuMbetelema kuputuka vamyaka yivali nakuneha mwishi. Oloze Yehova namulweze lyehi Yosefwe muchilota, kaha Yosefwe natanga yenyi hikuya kuEjipitu. Kutwala muze, Yosefwe hakwivwa nge Helote nafu, hikukindulwisa Maliya naYesu kwimbo kuNazaleta. Oku kukiko mwakolela Yesu.

Unashinganyeka ngwove iya alingishile numba ou tanganyika wamuhya amunyike? Anuka, vaze malunga hakumona uze tanganyika vayile chatete kuYelusalema. Satana Liyavolo asakile kujiha MwanaKalunga, kaha atachikijile ngwenyi Mwangana Helote wamuYelusalema mwafwila amujihe. Shikaho, atela kupwa Satana ikiye alingishile uze tanganyika numba amunyike.

Mateu 2:1-23; Mika 5:2.