¿NTILA, mo ntliya, cheʼw nqoptzʼaj aju nxi tyekʼin xjal tukʼe tqʼabʼ? Atz ẍi tzaja xjal lu jatumel njatza qʼij, nchi xnaqʼtzan kyiʼj cheʼw. Nkubʼ kyximin qa aju akʼaj cheʼw lu che xel qʼiʼn tuʼn jatumel taʼ jun xjal nim toklen.

Tej kypon xjal toj Jerusalén, xi kyqanin: ‹¿Jatumel taʼ kʼwal aju kʼokil te ajkawil kye xjal judiy? Aju yol «Judiy» atzun juntl kybʼi aj Israelju. ‹Tnejel ma qile tcheʼw tuj tjawitz qʼij, ex ma qo tzaje kʼulul twitz›, che chi xjal.

Tej tok tbʼiʼn Herodes, aju ajkawil te Jerusalén, tzaj bʼaj tkʼuʼj tuʼn jlu. Nyateq tajbʼil tuʼn tok juntl ajkawel. Tuʼntzunju xi tqanin kye kynejel pal kyjalu: ‹¿Jatum tuʼn titzʼj ju ajkawil aju o kyaj qʼamaʼn tuʼn tul? Xi kytzaqʼweʼn nejenel kye pale kyjaʼ: ‹Tuj tnam Belén chi Tuʼjil Tyol Dios›.

Kyjuʼtzun xi tqʼamaʼn Herodes kye xjal kyjalu: ‹Ku kyxiʼye, chebʼa kybʼime tiʼj neʼ; oktzun tknet kyuʼne, kytzaje qʼmalte weye, ax ikx waje tuʼn nxiʼye kʼulul twitz›. ¡Atzunte Herodes naq tajtoq tuʼn tkubʼ tbʼiyoʼn tal neʼ!

Tej kyetz xjal tuj Jerusalén kubʼ nej cheʼw kywitz tuʼn kypon tuj Belén, ex kubʼ ten jatumel taʼtoq tal kʼwaʼl. Tej kyokx xjal toj ja, lutaq María at tukʼex Jesús. Xi kyqʼoʼn oyaj te Jesús. Yajxitl, tzaj tqʼamaʼn Jehová kye tuj jun witzikʼj tuʼn miʼ kymeltzʼajtl tukʼe Herodes. Tuʼntzunju, e aj meltzʼaj toj junxitl bʼe tuʼntzun kypon toj kytnam.

Tej tok tbʼiʼn Herodes qa otaq chi aj xjal, tzaj nimxix tqʼoj. Xi tqʼamaʼn tuʼn kykubʼ bʼiyoʼn qejo tal neʼ iqʼin kabʼe abʼqʼi kyuʼn ex qeju naʼmxtoq tjapun kabʼe abʼqʼi kyuʼn. Atzunte Jehová otaq txi tqʼamaʼn te José toj jun witzikʼ, tuʼntzunju xiʼ José kyukʼex toj tja atz Egipto. Yajxitl, tej tok tbʼiʼn José qa otaq kyim Herodes, ajtz meltzʼaj juntl maj tukʼex María ex Jesús toj Nazaret. Atztzun chʼiy Jesús tuj Nazaret.

¿Alkyetzule bʼinchante tuʼn tqoptzʼaj aju akʼaj cheʼw? Naʼntza jlu, atz i eʼx xjal tnejel toj Jerusalén tej kylonte cheʼw. Tajbʼiltoq Satanás tuʼn tkubʼ tbʼiyoʼn tKʼwaʼl Dios, ex ojtzqiʼntaq tuʼn qa jakutoq tjyom Herodes tumel tuʼn tkubʼ tbʼiyoʼn tal kʼwal. Tuʼntzunju, jaw qoptzʼaj cheʼw tuʼn Satanás.