KOTO tí ki̱mi tí sánáʼa̱ ndaʼa̱ na̱ va̱xi nu̱ú na̱ʼná yóʼo. Tá ke̱ena ñuu Jerusalén, ki̱ta iin ki̱mi xi̱nina. Chí nu̱ú kíta Ñu̱ʼu ke̱ena, na̱ káʼvi xíʼin tí ki̱mi kúú na̱yóʼo. Ña̱ túvi miína, tí ki̱mi yóʼo íyo iin ña̱ náʼa̱rí nu̱úna.

Tá ki̱xa̱a̱ na̱yóʼo ñuu Jerusalén, ni̱nda̱ka̱tu̱ʼunna: ʼ¿Ndáa íyo ta̱ loʼo ta̱ xa̱a̱ kuu rey ña̱ ñuu Judá? Judá kúú inka ki̱vi̱ ñuu Israel. Chi xi̱nindi̱ tí ki̱mi ta va̱xindi̱ ndasakáʼnundi̱raʼ, káchina.

Tá na̱kunda̱a̱-ini ta̱ Herodes ta̱ rey ñuu Jerusalén ña̱yóʼo, ni̱sa̱a̱ní-inira. Chi kǒo kúni̱ra ña̱ koo inka rey, iinlá miíra koo rey kúni̱ra. Ña̱kán ni̱nda̱ka̱tu̱ʼunra na̱ su̱tu̱ náʼnu: ʼ¿Míí ñuu kaku ta̱ rey ta̱ káʼa̱nna xa̱ʼa?ʼ Na̱ su̱tu̱ yóʼo nda̱kuiinna: ʼÑuu Belén kakura káchi Tu̱ʼun Ndióxi̱ʼ.

Ta̱ Herodes ni̱ka̱ʼa̱nra xíʼin na̱yóʼo: ʼNandukúndó ta̱ loʼo yóʼo. Tá nda̱niʼíndóra, tasaá natúʼunndó xíʼi̱n, chi kúni̱i̱ ku̱ʼi̱n ndasakáʼnui̱raʼ. Soo su̱ví ña̱ ndixa kúú ña̱ kúni̱ra ku̱ʼu̱nra ndasakáʼnura ta̱ loʼo yóʼo, chi ta̱ kúni̱ra kaʼnívara kúúra.

Tasaá tí ki̱mi yóʼo kánúurí nu̱úna ku̱a̱ʼa̱nrí chí ñuu Belén, ta xi̱kundichirí míí sa̱tá veʼe nu̱ú íyo ta̱ loʼo yóʼo. Tá ni̱ki̱ʼvina ini veʼe, nda̱niʼína ñá María xíʼin ta̱ loʼo Jesús. Ta̱xina ña̱ʼa ndaʼa̱ra. Soo tándi̱ʼi Jehová ta̱xira iin xa̱ni nu̱úna ña̱ ná kǒo ndikóna nu̱ú ta̱ Herodes. Xa̱ʼa na̱yóʼo kǒo níndikóna nu̱úra, va̱ʼaka nda̱kiʼinna ku̱a̱ʼa̱nna chí ñuuvana.

Tá na̱kunda̱a̱-ini ta̱ Herodes ña̱ ndi̱kóna chí ñuuna, ni̱sa̱a̱ní-inira. Ta xa̱ʼndara chiñu ña̱ ku̱ʼu̱nna kaʼnína ta̱a válí ta̱ sa̱kán ka̱ku iin saá nda̱a̱ ta̱ ndíka̱a̱ u̱vi̱ ku̱i̱ya̱. Soo Jehová ta̱xira iin xa̱ni nu̱ú ta̱ José, ña̱ ná ku̱ʼu̱nra chí ñuu Egipto xíʼin na̱ veʼera. Tá ni̱ya̱ʼa tiempo, na̱kunda̱a̱-inira ña̱ ni̱xi̱ʼi̱va ta̱ rey Herodes, saá ndi̱kóra xíʼin ñá María ña̱ ñuu Nazaret. Ñuu Nazaret yóʼo kúú nu̱ú xa̱ʼnu ta̱ Jesús.

¿Ndáana kúú na̱ sa̱ndáye̱ʼe̱ tí ki̱mi xa̱á yóʼo? Á ndákaʼún, chi na̱yóʼo tá xi̱nina tí ki̱mi siʼnaka ñuu Jerusalén ni̱xa̱ʼa̱nna. Ta̱ Ndi̱va̱ʼa kúni̱ra kaʼníra ta̱ Jesús, ta xíni̱ra chi ta̱ rey Herodes kúni̱tu ta̱ yóʼova kaʼníra ta̱ Jesús. Ña̱kán ta̱ Ndi̱va̱ʼa kúú ta̱ sa̱ndáye̱ʼe̱ tí ki̱mi.