Kitojtokakej se sitalij
Tanojnots 86
Kitojtokakej se sitalij
¿UELI tikita sitalij tein petantok uan kimajpiluijtok nejin takat? Yejuan uitsej Tonalkisayampa, uan kinixmatij sitalimej. Moluiaj ika nejin yankuik sitalij kiniuika maj kiajsikan aksa ueyichiujkej.
Keman takamej ajsikej Jerusalén, tajtankej: ‘¿Kani yetok konet tein mochiuati imin tekiuaj judíos?’ “Judíos” katka okse tokayit tein kipiayaj israelitas. Takamej kijtojkej: ‘Ne Tonalkisayampa tikitakej isitalij, uan tiualajkej tikueyichiuakoj’.
Keman Herodes, tein tekiuajtia Jerusalén, kimatik nejin, mokuejmoloj. Yej amo kinekia maj itekiuajyo kikuini okse tekiuaj. Yejika kintajtanij tayekananij tiopixkamej: ‘¿Kani nemis tekiuaj tein moijtojtok?’ Yejuan tanankilijkej: ‘Biblia kijtoua ika nemis Belén’.
Yejika Herodes kiniluij takamej tein ualayaj Tonalkisayampa: ‘Xiktemotij konet, uan keman nankiajsiskej, xinechiluikij kani yetok. Uan no niyas nikueyichiuatiuj’. ¡Tein melauj Herodes kimiktisnekia konet!
Keman takamej kiskej Jerusalén nesik nejin sitalij. Ompa, kinixyekanak uan kinajxitij Belén, uan motsakuilij kampa yetoya konet. Keman takamej kalakkej kalijtik, kiajsitoj María uan konet Jesús. Ompa, kimakakej netetayokolilmej Jesús. Sayoj ika satepan, itech se takochitalis, Jiova kininejmachtij takamej maj amo mokepanij kampa tekiuaj. Yejika yajkej imin ueyi altepeuj itech okse ojti.
Keman Herodes kimatik ika takamej yajkajya, tel kualanik. Tanauatij maj kinimiktianij konemej tein kipiaskiaj ome xiuit uan tein okachi konemejok tein nemiaj Belén. Sayoj ika, itech se takochitalis Jiova achtook kinauatij José, uan yej yajki Egipto iuan ichankauan. Satepan, keman José kimatik ika Herodes mikkaya, mokepak Nazaret iuan María uan Jesús. Uan ompa moskaltij Jesús.
¿Akoni timoluia kichiuak maj nejon yankuik sitalij petanini? Xikelnamiki ika takamej yekinika yajkej Jerusalén keman kiitakej nejon sitalij. Amokuali Satanás kimiktisnekia iKoneuj Dios, uan kimatia ika Herodes tein tekiuajtia Jerusalén, kitemoskia keniuj kimiktis. Yejika Satanás kichiuak maj petanini nejon sitalij.
Mateo 2:1-23; Miqueas 5:2.
