TLAPOUALISTLI 86

Okitokakej se sitlali

¿UELI tikita sitlali petlantok tlen kimajpiluia se itech ninmej tlakamej? Ijkuak yejuan okiskej itech Jerusalén nin sitlali omonexti. Yejuan uitsej ik kanin kisa Tonaltsin, uan kitaj sitlalmej. Kineltokaj nin sitlali kinuikas inauak se akin ueyititok.

Ijkuak tlakamej oajsitoj Jerusalén, otetlajtlanijkej: ‘¿Kanin kajki konetl tlen mochiuas inueyi tekiua judíos?’. Israelitas noijki kintokayotiaj “judíos”. Tlakamej okijtojkej: ‘Tejuan achto otikitakej isitlal konetl ijkuak otikatkaj ik kanin kisa Tonaltsin, uan otiualajkej pampa tikueyichiuaskej’.

Ijkuak Herodes, ueyi tekiua itech Jerusalén, okimatki nin, okualanki. Ye amo okinekiaya okse ueyi tekiua ma peua tlanauati. Ik non, okintlajtlani tlayekankej teopixkamej: ‘¿Kanin nesis nin ueyi tekiua tlen omoijtojka?’. Yejuan okinankilijkej: ‘Biblia kijtoa nesis itech Belén’.

Ik non, Herodes okinmilui ninmej tlakamej tlen oualayaj ik kanin kisa Tonaltsin: ‘Xiktemokan konetl. Uan ijkuak nankajsiskej, xinechiluikan. Ne noijki nikneki nikueyichiuati’. Maski ijkon, ¡Herodes san okinekiaya kimiktis nin konetl!

Ijkuakon, sitlali opejki molinia inyekapan tlakamej uan oajsik Belén, uan omoketski ipan kali kanin okatka konetl. Ijkuak tlakamej okalakej kalijtik, okinmitakej María uan konetl Jesús. Okimakakej Jesús sekimej tetliokolilmej. Maski ijkon, Jehová okinmilui ika se kochtemikilistli amo ma mokuepakan ixpan Herodes. Ik non, yejuan oyajkej inaltepetl itech okse ojtli.

Ijkuak Herodes okimatki tlakamej tlen oualayaj itech kanin kisa Tonaltsin yoyajkej, okualanki miak. Otlanauati ma kinmiktikan nochtin chokotsitsintin itech Belén tlen yokipiayaj ome xiuitl noso ayamo okajxitiayaj. Maski ijkon, Jehová achto okimatilti José nin tlamantli ika se kochtemikilistli, uan José uan ichanejkauan oyajkej Egipto. Satepan, ijkuak José okimatki Herodes yomikik, omokuepkej José, María uan Jesús itech Nazaret. Ompa itech Nazaret omoskalti Jesús.

Ken tikita, ¿akin okichi ma petlani non yankuik sitlali? Xikilnamiki, achto ninmej tlakamej oyajkej Jerusalén ijkuak okitakej non sitlali. Satanás noso Diablo ye akin okinekiaya kimiktis iKone toTajtsin Dios, uan ye okimatiaya Herodes ueyi tekiua itech Jerusalén kinekiskia kimiktis. Ik non, uelis tikijtoskej ye Satanás okichi ma petlani non sitlali.

Mateo 2:1-23; Miqueas 5:2.