ULUETE onthungululu oyo yaliaima omulume oo ekahi nokuyulika? Onthungululu oyo, yamoneka etyi vatunda mo Jelusalei. Ovalume ava vatunda Koutundilo, iya velilongesa ononthungululu. Ankho vetyii okuti onthungululu oyo omphe maivehongolela komunthu umue wakolela.

Etyi ovalume ovo vehika mo Jelusalei vapula: ‘Opi pekahi omona makala ohamba yova Judeu?’ “Ova Judeu” enyina ekuavo liova Isilayeli. Ovalume vapopia okuti: ‘Tuamona tete onthungululu yomona kuna Koutundilo, iya pahe tueya okumufenda.’

Etyi Herode ohamba yomo Jelusalei eiva onondaka ombo, anumana. Mokonda ankho kahande ohamba onkhuavo iye imupole omphangu yae. Moluotyo, waihana ono saserdote apulu okuti: ‘Opi makutyitilwa ohamba yokualawa? Ovo avakumbulula okuti: ‘Ombimbiliya yapopia okuti maityitilwa mo Mbelei.’

Ngotyo, Herode waihana ovalume vokuatunda Koutundilo, evepopila okuti: ‘Endei mukaovole omona. Putyina muemuvasa, amuiya okumphopila. Mokonda naame nahanda okuenda okukemufenda.’ Mahi tyotyili, Herode ankho wahandele okuvasa omona opo emuipae.

Iya onthungululu aihongolela ovalume ovo alo ko Mbelei, iya aitalama pomphangu ankho pekahi omona. Etyi ovalume vanyingila mondyuo, vavasa Maliya nomona wae Yesu. Vaeta oviawa iya aveviavela Yesu. Mahi, Yehova walondola ovalume ovo mondyoi opo vahakondoke ku Herode. Moluotyo, vakondoka kotyilongo tyavo nondyila onkhuavo.

Etyi Herode eiva okuti ovalume Vokoutundilo vakondokale keumbo, anumana unene. Iya atumu okuipaa ovana aveho mo Mbelei ankho vokuna omanima evali. Mahi Yehova walondola Jose mondyoi, opo Jose nombunga yae vaye ko Egitu. Konyima, etyi Jose eiva okuti Herode wankhia, wapola Maliya na Yesu avakondoka keumbo ko Nazare. Oko Yesu ekulila.

Mahi, olie walinga onthungululu ina omphe iliaime? Hinangela okuti ovalume ovo vaya vala ko Jelusalei etyi vamona onthungululu. Satanasi Eliapu wahandele okuipaa Omona wa Huku, iya ankho utyii okuti Ohamba Herode yo Jelusalei maovola okuipaa omona oo. Ngotyo, Satanasi oe walinga onthungululu iliaime.