BO TA mira e strea briante ku e hòmber ta mustra riba dje? Ora nan a sali for di Yerusalèm, e strea a aparesé. E hòmbernan a bini di Oriente, i nan ta studia strea. Nan ta kere ku e strea nobo aki ta guia nan serka un persona importante.

Ora nan a yega Yerusalèm, nan a puntra: ‘Unda e mucha ku lo bira rei di hudiunan ta?’ “Hudiu” ta un otro nòmber pa israelita. E hòmbernan a bisa: ‘Nos a mira e strea di e mucha ora nos tabata na Oriente i nos a bini pa rindié homenahe.’

Ora Herodes, ku tabata rei na Yerusalèm, a tende esei el a bira hopi nèrvioso. E no tabata ke pa un otro rei tuma su lugá. P’esei Herodes a yama e saserdotenan prinsipal i a puntra nan: ‘Unda e rei primintí tin ku nase?’ Nan a kontestá: ‘Na Bètlehèm, segun Beibel.’

P’esei Herodes a yama e hòmbernan di Oriente i a bisa nan: ‘Bai buska e mucha. Ora boso hañ’é, laga mi sa. Mi tambe ke bai rindié homenahe.’ Pero, en realidat, Herodes kier a haña e mucha pa mat’é!

Anto e strea a bai dilanti di e hòmbernan te na Bètlehèm, i a para riba e lugá unda e mucha tabata. Ora e hòmbernan a drenta den e kas, nan a haña Maria ku e mucha Hesus. Nan a duna Hesus regalo. Pero despues Yehova a bisa e hòmbernan den un soño pa no bai bèk serka Herodes. P’esei nan a regresá nan pais via un otro kaminda.

Ora Herodes a tende ku e hòmbernan di Oriente a bai kas, el a rabia mashá. El a manda mata tur mucha hòmber na Bètlehèm di dos aña di edat bai abou. Pero Yehova a spièrta Hosé di antemano den un soño, i Hosé a bai ku su famia Egipto. Despues, ora Hosé a tende ku Herodes a muri, el a bai bèk ku Maria i Hesus na Názarèt. Hesus a krese ei.

Segun bo, ta ken a laga e strea nobo ei bria? No lubidá ku despues di a mira e strea e hòmbernan a bai Yerusalèm. Satanas e Diabel kier a mata e Yu di Dios, i e tabata sa ku Rei Herodes di Yerusalèm lo a purba mata Hesus. P’esei Satanas mester ta esun kende a laga e strea ei bria.

Mateo 2:1-23; Mikeas 5:2.