KAUST du daut kloare Stiern seenen, wua eena von de Mana hanwiest? Dise Mana sent jroz von Jerusalem wajchjewankt un daut Stiern trakjt dän tietäwa ver an. Dee sent vom Oosten, un daut sent soone, waut de Stierns utforschen. Dee jleewen, daut dit niee Stiern an no eenen besondren Mensch leiden woat.

Aus de Mana no Jerusalem jekomen wieren, hauden dee jefroacht: ‘Wua es daut Kjint, waut doa saul de Kjennich von de Juden woaren?’ ‘Juden’ es een aundra Nomen fa de Israeliten. De Mana hauden uk jesajcht: ‘Aus wie em Oosten wieren, sag wie daut Stiern von daut Kjint un sent jekomen, daut auntobäden.’

Aus Herodes, dee en Jerusalem Kjennich wia, doavon hieed, wia dee sea vestalt. Dee wull nich haben, daut een aundra en siene Städ sull Kjennich woaren. Doawäajen roopt Herodes de väaschte Priestasch un fruach dee: ‘Wua saul de vesproakna Kjennich jebuaren woaren?’ Dee auntwuaden: ‘En Betlehem, sajcht de Bibel’.

Dan roopt Herodes de Mana vom Oosten un säd: ‘Got un sieekjt daut kjliene Kjint. Wan jie daut jefungen haben, lot mie daut weeten. Ekj well dan uk gonen un daut aunbäden.’ Oba Herodes wull daut Kjint bloos dootmoaken!

Daut Stiern trock de Mana veropp bat Betlehem un bleef doa bowa de Städ stonen, wua daut Kjint wia. Aus de Mana en daut Hus nenjinjen, fungen dee Maria un dän kjlienen Jesus doa. See hauden Jeschenkja met un jeewen Jesus dee. Oba lota säd Jehova en eenen Droom to de Mana, see sullen nich trigj no Herodes gonen. Un soo jinjen dee opp eenen aundren Wajch trigj no äa Launt.

Aus Herodes enwort, daut de Mana vom Oosten trigj no Hus jegonen wieren, wort dee sea doll. Doawäajen befool dee, en Betlehem sullen aule Junges von twee Joa rauf dootjemoakt. Oba Jehova deed Josef em verut en eenen Droom woarnen, un soo veleet Josef met siene Famielje un jinkj no Ägipten. Lota, aus Josef hieed, daut Herodes jestorwen wia, jinkj hee met Maria un Jesus trigj no Nazaret. Doa woss Jesus dan opp.

Waut jleefst du, wäa daut Stiern jeschekjt haud? Denkj doaraun, daut daut Stiern de Mana ieescht no Jerusalem leid. Soton, de beesa Fient, wull Gott sienen Sän dootmoaken. Un hee wist krakjt, daut Kjennich Herodes von Jerusalem proowen wudd, Jesus omtobrinjen. Doawäajen mott daut Soton jewast sennen, dee daut Stiern jeschekjt haud.