BʼANTAJIK 86
Jun chʼumil xukʼut kibʼe
¿LA KATKUNIK kawil ri jun nimalaj chʼumil, tijan kukʼut jun chike ri achijabʼ? Naj kepe wi ri täq achijabʼ riʼ, xuqujeʼ kketijoj kibʼ chike ri täq chʼumil. Kkebʼij che wajun kʼakʼ chʼumil keʼukʼam bʼi rukʼ jun winaq nimalaj ubʼantajik.
Chiʼ ri täq achijabʼ xeʼopan Jerusalén, xketa wariʼ: ‹¿Jachiʼ kʼo wi ri akʼal che kubʼan na ajawinel pa kiwiʼ ri judíos?› Ri bʼiʼaj «Judíos» are jun chik kbʼix chike ri israelitas. ‹Naj ojkʼo wi chiʼ xqil lo ri uchʼumil›, xechaʼ ri achijabʼ. ‹Xojpe che uyaʼik uqʼij.›
Chiʼ Herodes, ri ajawinel rech Jerusalén, xuta wariʼ, sibʼalaj xuxibʼij ribʼ. Kraj täj che kok chi jun chik ajawinel. Rumal laʼ xuta chike ri täq ajkojol tabʼal toqʼobʼ: ‹¿Jachiʼ kkʼejeʼ wi ri ajawinel che bʼim ojer?› Are waʼ xkebʼij: ‹Ri Loqʼalaj Pixabʼ kubʼij che kkʼejeʼ pa Belén›, xechaʼ.
Rumal laʼ Herodes xubʼij chike ri achijabʼ che e petinäq naj: ‹Chitzukuj ri akʼal. Chiʼ kiriqo, chibʼij chwe. In kwaj kinbʼe che uyaʼik uqʼij›, xchaʼ. ¡Tekʼuriʼ Herodes are kraj kukamsaj ri akʼal!
Chiʼ xeʼopan Jerusalén, ri chʼumil xukʼut ribʼ che kiwäch. Tekʼuriʼ ri chʼumil xbʼin che kiwäch ri täq achijabʼ xopan Belén, tekʼuriʼ xtakʼeʼ chilaʼ jachiʼ kʼo wi ri akʼal. Chiʼ ri achijabʼ xeʼok pa ri ja xkil ri María rukʼ ri alaj akʼal Jesús. Xkeya täq sipanik che Jesús. Tekʼuriʼ Jehová xuya ubʼixik chike pa jun achikʼ che ketzalij ta rukʼ Herodes. Rumal laʼ chiʼ xebʼe pa kitinamit xebʼe pa jun chik bʼe.
Chiʼ Herodes xuto che ri täq achijabʼ xebʼek, sibʼalaj xpe royowal. Xutaq ukamsaxik ri alaj täq neʼ rech Belén majaʼ kʼo kebʼ kijunabʼ xuqujeʼ ri kʼo chi kebʼ kijunabʼ. Rumal laʼ Jehová xubʼij che José pa jun achikʼ, tekʼuriʼ José xeʼukʼam bʼi ri ufamilia Egipto. Chiʼ xuto che kamnäq chi ri Herodes, xeʼukʼam chi lo ri María rukʼ ri Jesús Nazaret. Waral Nazaret xkʼiy wi ri Jesús.
¿Jachin laʼ kabʼij at che xubʼan che ri chʼumil xkaʼyik? Musach chawe, ri täq achijabʼ xebʼe nabʼe Jerusalén chiʼ xkil wajun chʼumil. Ri itzel Satanás xraj xukamsaj ri Ukʼojol ri Ajawaxel, xuqujeʼ retaʼm che ri ajawinel Herodes rech Jerusalén kraj kukamsaj ri Jesús. Rumal laʼ are Satanás xubʼan che ri chʼumil xkaʼyik.
