¿RIKUCHKANKICHU dibujopi kanchariq lucerota chay runa tupqesqanta? Jerusalen llaqtamanta pasakuchkaptinkuñam chay luceroqa rikurirurqa. Paykunaqa lucerokuna qawaspa adivinaqkunam, hinaspa Intipa qespimunan lawmantam hamuchkanku. Chaymi paykunaqa piensanku chay rikurimuq luceroqa sapaqchasqa runapa kasqanman pusasqanta.

Israel casta runakunataqa “judiokuna” nispam sutichaqkupas. Chaymi chay runakuna Jerusalenman chayaramuspanku tapukurqaku: ‘¿Maypitaq kachkan judiokunapa reynin nacemuq? Intipa qespimunan lawpim luceronta rikuramuniku chaymi hamuniku adoraqnin’ nispa.

Jerusalenpi rey Herodes chayta yacharuspanmi hukmanyarurqa. Payqa manamá munarqachu paypa rantinpi huk reyña kamachikunantaqa. Hinaptinmi rey Herodesqa sacerdotekunapa jefenkunata tapurqa: ‘¿Maypim Cristo nacenqa?’ nispa. Paykunañataqmi nirqaku: ‘Diospa Palabranmi nin Judea law Belen llaqtapim’ nispa.

Chaymi Herodesqa Intipa qespimunan lawmanta hamuq runakunata nirqa: ‘Allinta maskamuychik, wawata tariruspaykichikñataqmi willaykachimuwankichik ñoqapas rispay adoraykamunaypaq’ nispa. ¡Herodesmi ichaqa wawata wañurachiyta munarqa!

Hinaptinmi chay luceroqa chay runakunapa ñawpaqninkuta rirqa Belen llaqtaman chayanankukama, hinaspam wawapa kasqan wasipi sayarurqa. Chaymi wasiman chay runakuna yaykuykuspankuñataq tarirurqaku Mariatawan wawan Jesusta. Hinaspam regalokunata Jesusman qorqaku. Jehová Diosmi ichaqa mosqoyninkupi nirqa amaña rey Herodesman kutinankupaq. Chaymi kutikurqaku huklaw ñannintaña.

Hinaptinmi Herodesqa adivinaqkuna pasakusqankuta yacharuspan llumpayta piñakururqa. Hinaspanmi Belen llaqtapi qari wawachakunata soldadonkunawan wañurachirqa iskay watachayoqmanta urayman. Manaraq chayta Herodes rurachkaptinmi Jehová Diosqa Joseyta mosqoyninpi ayqenanpaq nirqa, chaymi Joseyqa familianwan Egipto nacionman ayqekurqaku. Chaymanta, Herodespa wañurusqanta Josey yacharuspanña Jesusta mamantinta Nazaret llaqtaman pusarikuspa kutikurqa. Chaynapimá Nazaret llaqtapi Jesusqa wiñarqa.

Ima niwaqtaq, ¿pitaq chay lucerotaqa kancharichirqa? Yuyariy, chay runakunaqa Jerusalentam puntataqa rirqaku lucerota qawaspa. Satanas Diablom Diospa churintaqa wañurachiyta munarqa, hinaspa musyarqam Jerusalenpi rey Herodesqa wawata wañurachinanta. Hinaptinqa Satanaschiki chay lucerotaqa kancharichirqa.