TE KITE ra koe i tera etu kaka e tou ra tetai o teia au tangata? Te akaruke anga ratou ia Ierusalema, kua kiteia atu te etu. No te Itinga mai teia au tangata, e e apii ana ratou i te au etu. Irinaki ratou e te taki nei teia etu ou ia ratou ki ko i tetai tangata puapinga.

Te tae atu anga teia au tangata ki Ierusalema, kua ui ratou e: ‘Teiea te tamaiti ka riro ei ariki no te ngati Iuda?’ Ko te “ngati Iuda” tetai ingoa o te ngati Iseraela. ‘Kua kite mua matou i te etu o te tamaiti ia matou i te tua Itinga,’ i karanga ai te au tangata, ‘e kua aere mai matou i te akamori iaia.’

I te akarongo anga a Heroda, te ariki i Ierusalema i teia, kua taitaia aia. Kare aia i inangaro ana i tetai ariki ke kia mono i tona ngai. No reira kua kapiki a Heroda i te au taunga maata e kua ui e: ‘Ka anauia te ariki taputouia kiea?’ Pau mai ratou e: ‘Karanga te Pipiria e ki Betelehema.’

I reira kua kapiki a Heroda i te au tangata mei te Itinga, e kua karanga e: ‘Aere e kimi i te tamaiti meangiti. Me kite kotou iaia, akakite mai kiaku. Inangaro katoa au i te aere e akamori iaia.’ Te tika anga ra, inangaro a Heroda i te kimi i te tamaiti e ta iaia!

I reira kua neke te etu na mua ake i te au tangata ki Betelehema, e kua tapu ki runga i te ngai e noo ra te tamaiti. I te aere atu anga te au tangata ki roto i te are, kua kite ratou ia Maria e te tamaiti meangiti ko Iesu. Kua rave mai ratou i te au apinga aroa e kua oronga atu i te reira kia Iesu. Inara i muri mai kua akamatakite a Iehova i te au tangata na roto i te moemoea eiaa e oki atu ki ko ia Heroda. Kua oki atu i reira ratou ki to ratou uaorai enua na tetai mataara ke.

I te kite anga a Heroda e kua oki te au tangata mei te Itinga ki te kainga, kua riri tikai aia. No reira kua oronga aia i te akauenga kia tamateia pouroa te au tamariki tamaroa i Betelehema, e rua mataiti aere mai ki raro. Inara kua akamatakite a Iehova ia Iosepha i mua ake na roto i te moemoea, e kua aere atu a Iosepha e tona ngutuare tangata ki Aiphiti. Muri mai, te kite anga a Iosepha e kua mate a Heroda, kua apai aia ia Maria raua ko Iesu ki te kainga i Nazareta. Te ngai teia i maata mai ei a Iesu.

Naai i toou manako i maani i te etu ou kia iti mai? Akamaara ana, kua aere te au tangata na mua ki Ierusalema i muri ake i te kite anga i te etu. Kua inangaro a Satani te Tiaporo i te ta i te Tamaiti a te Atua, e kua kite aia e ka timata te Ariki ko Heroda o Ierusalema i te ta ia Iesu. No reira, na Satani i maani i te etu kia iti mai.