KONNI manni giddo mittichchu angichchunni kulannota roorte xabbanno beeddakko laitto? Kuni manni Yerusaalametenni kai wote, tini beeddakko leeltunsa. Insa Soojjaatinni daggino; ayyaantote yinannireeti. Insa, tini haaro beeddakko mittu ayirradu manchiwa massitanni noonke yite heddino.

Kuri mannooti umo Yerusaalame martu wote, ‘Yihudootaho nugusa ikkanno qaaqqi hiikko no?’ yite xaˈmitu. “Yihudootu” yaa wole Isiraeelete suˈmaati. Mannootuno togo yitu: ‘Ninke Soojjaato heeˈne qaaqqu beeddakko balanxe laˈne, sagandammosira dangoommo.’

Yerusaalamete nugusa ikke noohu Heroodiisi tenne macciishshiti masi. Isi wolu nugusi bayichchosi adhannota dibaxino. Konni daafira kakkalaanote biilla woshshe, ‘Ilamanno yine qaale eˈnoonni nugusi ilamannohu hiikkooti?’ yee xaˈmi. Insano, ‘Qullaawu Maxaafi Beeteleemete ilamanno yaanno’ yite qoltusi.

Hakkiinnino Heroodiisi Soojjaatinni dayi manna woshshe togo yii: ‘Hadhine ilamino qaaqqo hasse. Anino mare isira sagada hasiˈroommona, affiniha ikkiro kulleˈˈe.’ Ikkollana Heroodiisi qaaqqo hasiˈrinohu shaara yoreeti!

Hakkiinnino beeddakko konne manna massagganni Beeteleeme hadhu; qaaqqu noo taaloote iillituti uurritu. Mannuno minira ei wote, Maariyaaminna qaaqqu Yesuusi hakko no. Insano abbitino elto Yesuusira uyitu. Gedensaanni kayinni Yihowa haaqetenni mannootaho, Heroodiisiwa higginoonte yee kulinsa. Konni daafira mannootu gobbansa wole doogo widoonni higgu.

Heroodiisi Soojjaatinni daggu mannooti gobbansa higginota afiti, lowo geeshsha hanqi. Konni daafira Beeteleemete lame diro woˈminonsarenna lamu diri woroonni noore labballo qaaqquulle baala shine gundanni gede hajaji. Yihowa kayinni balaxe Yooseefira tenne haaqetenni kulinosi daafira, Yooseefi maatesi ledo Gibitse haˈri. Yannate gedensaanni Yooseefi, Heroodiisi reyinota afiti, Maariyaaminna Yesuusa haare Naazireete higi. Yesuusi lophphinohu hakkooti.

Tenne haaro beeddakko leeltanno gede assinohu aye lawannohe? Mannootu tenne beeddakko laˈuhu gedensaanni, Yerusaalame hadhinota qaagi. Sheexaanu Daawuloosi Maganu Beetto shaara hasiˈrino; qoleno Yerusaalamete nugusi Heroodiisino shaara hasiˈrannota afino. Konni daafira tenne beeddakko fultanno gede assinohu Sheexaaneho.