UYAYIBONA yini lenkhanyeti lekhonjwa ngulendvodza? Lenkhanyeti yavela nawesuka eJerusalema. Lamadvodza atati letivela eMphumalanga. Akholelwa kutsi lenkhanyeti iwaholela kumuntfu lotsite lobalulekile.

Nawefika eJerusalema, abuta: ‘Uphi lomntfwana lotelwe lotawuba yinkhosi yemaJuda?’ ‘EmaJuda’ ngulelinye ligama lema-Israyeli. Achubeka atsi: ‘Sibone inkhanyeti lesiholele kulomntfwana nasisuka eMphumalanga, futsi site kutemkhotsamela.’

Lapho Herodi loyinkhosi yaseJerusalema eva ngaloku, wakhatsateka. Abengafuni kutsi lenye inkhosi itsatse sikhundla sakhe. Ngako-ke wabita baphristi labakhulu futsi wababuta: ‘Itawutalelwa kuphi lenkhosi letsenjisiwe?’ Baphendvula batsi: ‘LiBhayibheli litsi utawutalelwa eBhetlehema.’

Ngako-ke Herodi wabita letati taseMphumalanga, watsi kuto: ‘Hambani nimfunisise kahle lomntfwana. Nasenimtfolile, nibobuya nitewungatisa. Nami ngifuna kuyemkhotsamela.’ Kepha empeleni, Herodi abefuna kumbulala.

Lenkhanyeti yaphindze yabonakala, futsi yatiholela eBhetlehema yaze yema lapho kunalomntfwana khona. Natingena endlini tatfola Mariya akanye naJesu, futsi tapha Jesu tipho. Kwatsi ngemuva kwaloko Jehova watecwayisa ngeliphupho kutsi tingabuyeli kuHerodi. Ngako-ke tabuyela eveni lato ngalenye indlela.

Lapho Herodi eva kutsi letati taseMphumalanga setibuyele eveni lato, watfukutsela kakhulu. Ngako-ke wakhipha umyalo wekutsi kubulawe bonkhe bafana baseBhetlehema labaneminyaka lemibili nobe ngaphansi. Kepha Jehova wecwayisa Josefa ngeliphupho kutsi akatsatse umndeni wakhe abalekele eGibhithe. Lapho Josefa eva kutsi Herodi ufile, watsatsa Mariya kanye naJesu wabuyela ekhaya eNazaretha. Ngulapho-ke Jesu akhulela khona.

Ucabanga kutsi ngubani lowaveta lenkhanyeti? Khumbula kutsi lamadvodza acala ngekuya eJerusalema, ngemuva kwekubona lenkhanyeti. Sathane Develi abefuna kubulala iNdvodzana yaNkulunkulu, futsi bekati kutsi Herodi iNkhosi yaseJerusalema utawufuna kumbulala. Ngako-ke, nguSathane lokungenteka waveta lenkhanyeti.