ISTÓRIA 86
Fitun ida neʼebé hatudu dalan ba ema
HAREE ka lae, fitun nabilan tebes neʼebé ema ida-neʼe hatudu? Fitun neʼe mosu bainhira sira sai husi Jeruzalein. Mane sira-neʼe mai husi Leste, no sira estuda fitun. Sira fiar katak fitun foun neʼe sei lori sira ba ema ida neʼebé importante.
Kuandu iha Jeruzalein, sira husu: ‘Labarik ida atu sai Judeu sira-nia liurai mak iha neʼebé?’ “Judeu” mak naran seluk ba ema Izraél. Mane sira neʼe hatete: ‘Kuandu ami iha Lorosaʼe, ami haree labarik neʼe nia fitun, nuneʼe ami mai atu hanaʼi nia.’
Kuandu liurai iha Jeruzalein, naran Herodes, rona kona-ba ida-neʼe, nia laran-nakali tebes. Nia lakohi liurai seluk hadau ninia fatin. Nuneʼe, Herodes bolu amlulik boot sira no husu: ‘Iha neʼebé mak liurai neʼebé promete nanis sei moris?’ Sira hatán: ‘Bíblia hatete iha Belein.’
Nuneʼe, Herodes bolu ema sira husi Leste, hodi dehan: ‘Bá buka labarik neʼe. Kuandu imi hetan nia, fó-hatene mai haʼu. Haʼu mós hakarak bá no hanaʼi nia.’ Maibé, tuir loloos, Herodes hakarak hetan labarik neʼe atu oho nia!
Depois, fitun neʼe muda atu hatudu dalan ba Belein, no para iha fatin neʼebé labarik neʼe hela. Mane sira neʼe tama iha uma laran, no hetan Maria no meninu Jesus. Sira fó prezente balu ba Jesus. Maibé, Jeová fó avizu ba mane sira-neʼe iha mehi atu labele fila fali ba Herodes. Nuneʼe, sira fila ba sira rasik nia rai husi dalan seluk.
Bainhira Herodes hatene katak mane sira neʼebé mai husi Leste fila tiha ba sira-nia rai, nia sai hirus tebetebes. Nuneʼe, nia fó orden ida atu oho labarik-mane hotu neʼebé tinan rua ba kraik iha Belein. Maibé, ulukliu, Jeová fó avizu ba José iha mehi, no José ho ninia família halai ba Ejitu. Tempu liu tiha, kuandu José rona katak Herodes mate tiha ona, nia lori Maria no Jesus fila fali ba Nazaré. Iha neʼe mak fatin neʼebé Jesus sai boot.
Tuir ó-nia hanoin, sé mak halo nabilan fitun foun neʼe? Hanoin-hetan katak mane sira-neʼe haree fitun neʼe molok bá Jeruzalein. Diabu Satanás hakarak oho Maromak nia Oan, no nia hatene katak Liurai Herodes iha Jeruzalein sei koko atu oho nia. Nuneʼe, Satanás mak halo nabilan fitun neʼe.
